Romer Butuyan 
POSIBLENG magpasya na lang si Vice President Sara Duterte na magbitiw sa pwesto sa halip na harapin ang mga kinakaharap na reklamo at ebidensyang tiyak hindi niya kayang salagin, ayon kay Atty. Lorna Kapunan.
Gayunpaman, nilinaw ni Kapunan na hindi pwedeng itigil ang impeachment trial kahit pa magbitiw si Duterte bilang bise presidente.
Katunayan aniya, hindi lang pwesto ang usapin sa impeachment trial kundi ang pananagutan sa pagkakasalang may karampatang parusang perpetual disqualification from public office.
“Sa nakita niyang ebidensya, napakalakas—magre-resign iyan,” wika ni Kapunan sa ginanap na Saturday News Forum sa Dapo Restaurant, Quezon City.
Si Duterte ay nahaharap sa impeachable offenses kabilang ang misuse of confidential funds, unexplained wealth, at threats against top government officials.
Ayon kay Kapunan, suportado ng dokumento, ebidensya at sinumpaang testimonya sa ginanap na pagdinig ng House Justice Committee.
Kabilang sa mga binanggit ni Kapunan ang ulat ng Anti-Money Laundering Council (AMLC) kung saan nabunyag ang P6.77 billion na total transactions sa mga bank account ng bise presidente at mister nitong si Atty. Manases Carpio.
Hindi rin aniya madaling idepensa ang malaking diperensya sa pagitan ng Statement of Assets, Liabilities and Networth (SALN) na isinumite ng bise presidente.
May kabigatan din umano ang notice of disallowances na inilabas ang Commission on Audit (COA) sa nasa P448 million confidential fund na pinamamahalaan ni Duterte.
Beripikado rin aniya ng National Bureau of Investigation (NBI) ang “authenticity” ng “kill threat” ni Sara kay Pangulong Ferdinand Marcos Jr., First Lady Liza Araneta-Marcos, at dating House Speaker Martin Romualdez.
“The impeachment is distinct from criminal and civil cases, it is a class of its own. Hindi ito criminal case. Walang imprisonment sa impeachment,” paliwanag niya.
“While criminal cases such as plunder may result in imprisonment and asset recovery, impeachment penalties are limited to removal from office and disqualification from holding future public office,” dugtong ni Kapunan.
Gayunpaman, kailangan ang two-thirds vote ng mga Senador para sa mapatalsik sa pwesto ang isang impeachable official.
