.. 
PARA kay Vice President Sara Duterte, walang sustansya ang mga petisyong kumukwestyon sa legalidad ng paglilipat ni Pangulong Ferdinand Marcos Jr. ng P125-milyong confidential funds sa kanyang tanggapan noong 2022.
Hirit ng kampo ni Duterte – ibasura na, lalo pa aniya’t pawang agam-agam at ispekulasyon lamang ang basehan ng mga petisyon hinggil sa pondong ginamit para ilapit ang serbisyo ng Office of the Vice President sa mga mamamayan sa iba’t ibang bahagi ng bansa.
Sa inihaing consolidated comment ni Atty. Estelito Mendoza na tumatayong abogado ni Duterte, hayagang sinabi ng Bise Presidente wala rin aniyang malinaw na kaso batay sa pamantayan ng husgado.
“The petitions are mere apprehension and speculation about contingent funds or confidential funds, which does not constitute a justiciable controversy,” saad sa isang bahagi ng dokumentong isinumite ni Mendoza para kay Duterte sa Korte Suprema.
Kabilang sa mga hirit ibasura ang mga petisyong inihain ng mga batikang abogado tulad nina former Comelec chairman Christian Monsod, dating commissioner Augusto Lagman, Howie Calleja, former Finance Undersecretary Maria Cielo Magno, Imelda Nicolas, ng Commission on Filipinos Overseas (CFO), Ibarra Gutierrez III, Katrina Monsod, Ray Paolo Santiago, Honorio Poblador III, Vicente Romano III, Rex Drilon, at Miguel Jugo.
Partikular na hirit ng mga petisyon atasan si Duterte na ibalik sa P125 milyong confidential fund sa tanggapan ng pambansang ingat-yaman.
Patutsada pa ni Duterte sa huling bahagi ng kalatas, hindi lahat ng kontrobersiya dapat patulan ng Korte Suprema.
“To conclude, it is important to state that courts do not sit to adjudicate mere academic questions to satisfy scholarly interest therein, however intellectually solid the problem may be.Indeed the mandate of the honorable court does not include the duty to answer all of life’s questions.”
