Romer Butuyan 
WALANG makakapigil kay dating House Speaker Martin Romualdez na bumiyahe sa bansang Singapore.
Ito ang giit ni Atty. Ade Fajardo sa nalalapit na pag-alis ni Romualdez para sa panibagong pagsusuri matapos sumailalim sa isang sensitibong medical procedure.
Ayon kay Fajardo, lahat ng opisyal at legal na paraan ay ginawa umano ni Romualdez upang makalipad patungong Singapore dahil sa ‘overdue follow up’ ng kanyang naging Angioplasty surgery.
Giit ni Fajardo, wala pang isinasampang kaso laban kay Romualdez. Wala pa rin aniyang inilalabas na hold departure order (HDO) laban sa dating lider ng Kamara.
“First, Leyte Rep. Ferdinand Martin G. Romualdez is not ‘barred’ from leaving the country. What exists, if any, is an immigration lookout bulletin order, which does not prohibit travel but simply requires prior coordination with authorities,” bungad ni Fajardo.
“In fact, Rep. Romualdez sought travel authority in all good faith—and this authority has been granted. This underscores his full compliance with the law and negates any insinuation of flight risk,” dugtong niya.
Nabatid na kahapon, Abril 20, 2026 ay lumiham si Romualdez kay Speaker Faustino Dy III, sa pamamagitan din ni House Secretary General Atty. Cheloy Garafil para humingi ng travel clearance kaugnay sa nasabing pagpunta nito sa Singapore.
Kasabay nito ay sumulat din ang Leyte lawmaker sa Department of Justice (DOJ) para ipabatid ang pagnanais niyang lumabas na ito ng bansa, bunsod na rin ng Immigration Lookout Bulletin Order (ILBO) na inilabas noong Oktubre ng nakalipas na taon
Pagbibigay-diin ni Romualdez sa lider ng Kamara, tiyak siyang babalik agad sa Pilipinas matapos ang kanyang medical engagement “and remain accessible for any urgent legislative matters.” Ang hiling ng Visayan solon ay manatili sa Singapore mula April 20 hanggang May 4, 2026.
Samantala, sinagot din ni Fajardo ang pahayag ni Ombudsman Crispin Remulla na pagkakaroon umano ni Romualdez ng ‘freeze oder” mula sa Anti-Money Laundering Council (AMLC).
“On the reported request for a freeze order: under the law, the Anti-Money Laundering Council must file a formal application before the Court of Appeals, supported by evidence, before any freeze order may be issued,” anang abogado.
“As of this time, we have received no official notice of any such application or order. Any statement suggesting that a freeze order is imminent remains speculative,” dagdag pa ni Fajardo.
Umapela rin si Fajardo sa lahat na iwasang gumawa ng anumang konklusyon mula sa kulang at hindi opisyal na impormasyon kung saan pinaninindigan niya na patuloy at mahigpit na nirerespeto ni Romualdez ang legal na proseso.
“If and when any formal action is taken, we will respond fully and appropriately before the proper forum. Until then, these remain unverified claims, and our client is entitled to the presumption of innocence.”
Sa kaugnay na balita, lumabas na rin ang hirit na travel clearance na hirit ni Romualdez.
