Money trail ng confidential funds, natunton kay Sara?

KUNG pagbabatayan ang mga ipinrisintang dokumento at testimonya ng mga testigo, malinaw na pangalawang pangulo ang dapat managot sa maling paggamit sa P500-million confidential funds ng Office of the Vice President (OVP).

Ito ang giit ni House prosecution panel spokesman at Lanao del Sur Rep. Zia Alonto Adiong, kasabay ng panawagan sa publiko na huwag magpalinlang sa mga palusot ng kampo ni Vice President Sara Duterte.

Hindi rin aniya dapat malito ang mga mamamayan sa mga testigo kaugnay ng impeachment cases laban sa bise presidente.

Partikular na tinukoy ni Adiong ang salaysay ni former OVP special disbursing officer Gina Acosta, at OVP Assistant Secretary Lemuel Ortonio.

“Huwag natin gawing komplikado ang isang simpleng tanong, sino ang may kapangyarihan? Vice President Sara Duterte. Her request, her approval, her signatures, her certification, her direct supervision,” wika ni Adiong.

“You cannot claim authority when money is requested and then suddenly disappear from the story when accountability is demanded,” dagdag ng kongresista.

Ani Adiong, dapat tutukan ng taumbayan ang tinatawag na “basic chain of action: who asked for the money, who approved it, who certified it and who supervised its use.”

“The questions are basic. Sino ang humingi? Sino ang nag-approve? Sino ang nag-certify? Sino ang nag-supervise?” 

Sinabi rin ng Lanao del Sur solon na hindi maaaring paghiwalayin ang pagkakaroon ng responsibilidad at pamumuno o posisyon sa gobyerno.

“Leadership also means accepting accountability. Hindi pwedeng authority sa taas tapos accountability sa baba.”

Sinegundahan ni Kabataan Party-list Rep. Renee Co, isa rin sa mga tagapagsalita ng prosecution panel, ang obserbasyon ni Adiong.

“Sa documentary trail ay nakita natin, siya (Duterte) po ang humingi ng pondo, siya po ang pumirma, siya po ang nag-apruba… ang mga dokumento mismo ay nag-uugnay sa kanya sa certification at direct supervision,” sambit ng militanteng kinatawan.

“At habang ang kanyang senior officials ay nagdi-disclaim ng personal knowledge tungkol sa actual confidential operations, hindi naman po nawawala si VP Sara sa documentary trail.” aniya pa. 

Kaya naman para sa prosekusyon, napatunayan na ang pananagutan ng bise presidente sa maling paggamit ng confidential funds nito.

“So far, the prosecution was able to establish that the OVP confidential funds were transferred to Lachica even though he is neither a regular employee of the OVP or a bonded officer,” bulalas ni Adiong.

“That is very clear, that has been proven, and that cannot be negated by any testimony from any other individuals. Kung na-prove naman po ‘yun, there’s no more move to repeat to have repetitive issues or repetitive concerns or repetitive answers from any other individuals.”