.. 
KUMBINSIDO si Senador Sherwin Gatchalian na higit niyang kailangan ang ibayong ingat bunsod ng di umano’y banta sa kanyang kaligtasan ng sindikato sa likod ng illegal POGO hub sa bayan ng Bamban, lalawigan ng Tarlac.
Pag-amin ni Gatchalian, isang lihim ang ipinadala ng kanyang tanggapan kay Police Major Paul Benjamin Mandate na tumatayong sub-station commander ng himpilan ng pulisya hindi kalayuan sa Senado.
Hirit ng senador sa pulisya, imbestigahan ang kumakalat na online video kung saan tahasan aniya ang pagbabanta sa kanya at maging kay Senador Risa Hontiveros na tumatayong chairperson ng Senate Committee on Women, Children, Family Relations and Gender Equality na nagsasagawa ng imbestigasyon sa illegal POGO operation sa bansa.
Sa naturang liham, binanggit din ni Gatchalian ang pangalan ni suspended Bamban Mayor Alice Guo.
“On July 4, 2024, I was informed by my staff of a video circulating online containing explicit threats directed at my personal safety and well-being,” saad sa isang bahagi ng liham kay Major Mandate.
Pinadalan na rin umano ni Gatchalian si Major Mandate ng transcript na nasabing video na inupload sa You Tube channel ng Pinas Insider na may pamagat na “Hala! Alice Guo nagbayad ng 10 million para iligpit si Sen. Risa at Win Gatchalian?”.
“In light of these serious threats, I formally request that the Pasay City Police initiate a police report on this matter and conduct a thorough investigation. I urge you to take swift action to ensure the safety of myself and those associated with me,” wika ni Gatchalian.
“I am available to provide further information or answer any questions you may have regarding this matter,” dugtong ng senador.
