Romer Butuyan 
SA kanyang pagharap sa pagdinig ng House Justice Committee, inamin ng isang opisyal mula sa Anti-Money Laundering Council (AMLC) na kabilang si Vice President Sara Duterte at asawang si Atty. Mans Carpio sa mga binabantayan ng ahensya bunsod ng pambihirang agos ng pera sa bangko.
Pag-amin ni AMLC Executive Director Ronel Buenaventura, partikular na minamanmanan ang daloy ng perang posible aniyang mula sa kita sa kalakalan ng droga — bukod pa sa hinalang “kickback,” kung hindi man direktang ninakaw sa gobyerno.
Nagsumite rin sa komite si Buenaventura ng 15-page confidential information-sharing document na bahagyang binasa ni Mamamayang Liberal partylist Rep. Leila de Lima.
“The Vice President was the subject of suspicion in 27 confidential reports submitted by covered persons on 2 August 2024 to 29 January 2026,” wika ni Buenaventura bunsod aniya ng “suspected activities involving drug trafficking and related offenses, graft and corrupt practices, and malversation of public funds and property.”
Nag-umpisang maghinala ang AMLC sa drug trafficking sa mga lumabas na impormasyon na kalakip ng House Quad Committee hearing sa madugong giyera kontra droga ni former President Rodrigo Duterte, gayundin ang mga ulat na pagkakasangkot ni Atty. Carpio sa P6.4 billion shabu importation noong 2017.
Hinggil naman sa akusasyon ng graft and corrupt practices at malversation of public funds, sinabi ni Buenaventura na nagsilbing batayan ang mga bank transactions ng bise presidente base sa “news articles related to the impeachment case filed against VP Sara in 2025, as well as alleged misuse of confidential/intelligence funds.”
Para kay De Lima, malaking bentahe ang mga ibinunyag ng AMLC na nag-iingat ng mga dokumentong magpapatunay na may masamang rekord ang mag-asawang Duterte-Carpio.
“So, pinapakita po nito na meron pala kayong talagang nakuha o nailagay, nai-report na derogatory records involving the two subjects of your confidential information sharing,” anang lady partylist solon, na sinagot naman ni Buenaventura na “based on records, yes, Madam Chair.”
Nang tanungin hinggil sa pinagmulan ng impormasyon, itinuro ng AMLC official ang mga “regulated financial institutions” na inatasang tukuyin ang mga kaduda-dudang transaksyon.
“This one is reported by the banks, by the covered persons, Madam Chair,” sabi pa ni Buenaventura, bilang pagkumpirma na naiparating sa kanilang impormasyon.
Hinggil naman sa bank transactions ni Atty. Carpio, sinabi ng AMLC na ito’y “subject of suspicion in 17 confidential reports submitted by covered persons on 14 September 2017 to 25 April 2025.”
Ang sinasabing “suspected activities” ay may kaugnayan umano sa drug trafficking and related offenses at malversation of public funds and property.”
“For drug trafficking and related offenses, the reports were triggered in connection with the news report on alleged involvement in the P6.4 billion shabu importation in 2017,” ani Buenaventura.
