Romer Butuyan 
POSIBLENG hilingin ng House prosecutors sa Senate impeachment court ang pagbubukas ng bank accounts at income tax records ni Vice President Sara Duterte, gayundin ang abogadong asawa na si Mans Carpio.
Ayon kay Bicol Sara Partylist Rep. Terry Ridon, na mamumuno sa paglalatag ng Article II hinggil sa tinaguriang “unexplained wealth,” maling pagdedeklara ng Statement of Assets, Liabilities and Net Worth (SALNs) at kabiguan bitawan ang interes sa negosyo, maituturing na dagdag na ebidensiya ang hirit na buksan ang bank at tax records ng pangalawang pangulo.
“We do not want to discuss further the specific details, because we are already within the impeachment trial process. But additional evidence that was not fully disclosed during the House Committee on Justice proceedings will be sought for presentation before the Senate impeachment court,” sabi pa ng Ridon, na siya ring chairman ng House Public Accounts Committee.
“Kasama po diyan ang unsealing of the BIR (Bureau of Internal Revenue) box. Kasama rin po dito ang pagbubukas ng bank records ng mag-asawang Duterte-Carpio, subject of course to the authority and processes of the Senate impeachment court,” dagdag ng Bicol Saro PL solon.
Una nang napagpasyahan ng House justice committee hindi buksan ang selyadong kahon na isinumite ng BIR na naglalaman ng tax records ng Duterte-Carpio couple dahil sa usaping legal.
Sa halip ay isinailalim ng komite sa kustodiya nito ang sealed box at nagpahayag na kanilang iti-turn over na lamang ito sa Senate impeachment court para magamit na karagdagang ebidensiya laban sa bise presidente.
Ibinida rin ni Ridon ang kahandaan ng House prosecution panel iprisinta ang impeachment article kapag pormal nang sinumulan ang impeachment trial.
“On unexplained wealth, nakita naman po natin ang body of evidence during the Committee on Justice proceedings. We believe the evidence on record, together with additional evidence that may be allowed by the impeachment court, will be central to the prosecution’s case,” aniya.
Kabilang sa nalantad sa nakaraang Justice committee hearings, ang ulat ng Anti-Money Laundering Council (AMLC) hinggil sa flagged transactions, na aabot sa halagang ₱6.77 billion, ng bank accounts na iniuunay sa mag-asawa sa nakalipas na 20 taon.
Sa nasabing bank transactions, ₱4.4 billion ang tinatawag na inflows o kabuuang halaga na pumasok habang ang outflows o lumabas ay ₱1.5 billion, habang sa pagtaya ng mga committee member ay posibleng aabot sa ₱2.8 billion ang net inflows.
Naniniwala ang mga mambabatas na ang mga nabanggit na financial movements sa mga bank account ng bise presidente ay hindi naideklara sa isinumiteng SALN.
