Fake news problema ng House prosecutors

AMINADO si Senior Deputy Majority Leader Lorenz Defensor na isa sa malaking hamon na kinakaharap ng 11-member House prosecution panel ang pagsalag sa mga bayarang trolls na nagpapakalat ng fake news.

“One of the biggest challenges that we face is fake news, trolls na mali ang ikinakalat na balita, maling ebidensya ang binabarena sa utak ng ating mga kababayan,” bulalas ng Iloilo lawmaker.

“Ang fake news at trolls dapat matigil na ’yan,” dugtong ni Defensor.

Para sa nasabing kongresista, ang impeachment proceedings ay mahalagang hakbang para mapanindigan ang pagkakaroon ng pananagutan sa hanay ng mga opisyal ng pamahalaan subalit dahil sa mga maling impormasyon lumalabas sa social media, ay nalilihis ang atensyon at nagkakaroon ng maling pananaw ang taumbayan sa mga kakibat na usapin.

“This impeachment is one of the biggest step that we can take for accountability to start in this country,” ani Defensor.

“Pero dapat ma-overcome din natin ang fake news dahil hindi natin maaabot ang katotohanan, hindi lang sa impeachment na ito but truth in every day living kung hindi natin ma-overcome ang fake news at mga trolls na umaatake, hindi lang sa House of Representatives but to truth itself,” dagdag niya.

Ginawa ni Defensor ang pahayag sa isinagawang press conference ng 11-member House prosecution panel na pinangunahan ni House Committee on Justice Chair at Batangas 2nd District Rep. Gerville “Jinky Bitrics” Luistro.

Si Luistro ang mamumuno sa hanay ng House prosecutors, na kinabibilangan din nina Reps. Terry Ridon (Bicol Saro Party-list), Ramon Rodrigo Gutierrez (1-Rider Party-list), Ysabel Maria Zamora (San Juan City), Jose Manuel “Chel” Diokno (Akbayan Party-list), Leila de Lima (Mamamayang Liberal Party-list), Kaka Bag-ao (Dinagat Islands), Jonathan Keith Flores (Bukidnon 2nd District), Lordan Suan (Cagayan de Oro 1st District) at Joel Chua (Manila 3rd District).

Nanindigan ang House prosecutors na malakas ang ebidensiya laban sa bise presidente.

“We’re very confident with the evidence that we have. We have been prepared with this since last year,” aniya pa.

Sinabi naman ni Ridon, na mas marami pang bagong ebidensya ang maaring ilabas sa pag-usad ng pagdinig.