Romer Butuyan 
TULAD ng inaasahan, nagbigay-hudyat na ang pamunuan ng Kamara sa isasagawang “congressional investigation in aid of legislation” hinggil sa kinakaharap na krisis sa enerhiya ng bansa.
Sa isang kalatas, nagpahayag na kahanraan ang pamunuan ng mababang kapulungan i-arangkada ang anila’y “high-level joint hearing” na kinabibilangan ng 13 “key committees” para sa pagsusulong ng agarang tugon sa epekto ng hidwaan sa Middle East.
Ayon kay House Speaker Faustino Dy III, pangangasiwaan ni Marikina City Rep. Miro Quimbo, chairman Committee on Ways and Means ang mga pagdinig sa hangarin makabuo ng mga panukalang batas na magtutulak ng short at long-term solution sa tinaguriang oil price shock.
Nais din ni Dy magkaroon ng masusing koordinasyon ang joint panels sa sangay ng Ehekutibo at makabuo ng policy interventions para maibsan ang mabigat na epekto ng nasabing problema, gayundin bilang tugon sakaling muling maganap sa hinaharap.
Bukod kay Quimbo, kabilang sa mga inaasahang dadalo sina Palawan Rep. Jose Alvarez (Energy), Quezon Rep. Mark Enverga (Agriculture and Food), Nueva Ecija Rep. Mikaela Angela Suansing (Appropriations), Camarines Sur Rep. Tsuyoshi Anthony “Hori” Horibata (Aquaculture and Fisheries Resources), Antique Rep. Antonio Legarda Jr. (Economic Affairs), Pangasinan Rep. Maria Rachel Arenas (Foreign Affairs), Camarines Sur Rep. Miguel Luis Villafuerte (Information and Communications Technology), Cavite Rep. Jolo Revilla (Labor and Employment), Agimat Partylist Rep. Bryan Revilla (Overseas Workers Affairs), Davao Oriental Rep. Cheeno Miguel Almario (Social Services), Mountain Province Rep. Maximo Dalog Jr. (Trade and Industry), at Quezon City Rep. Franz Pumaren (Transportation).
Inaasahan ding tatalakayin sa joint-panel hearing ang oil at energy supply situation ng bansa, iba pang epekto sa local economy ng umiiral na global oil at energy crisis, ang mga aksyon ng gobyerno at iba pang panukalang solusyon sa problema.
Imbitado sa pagdinig ng ilang cabinet officials, regulators, at economic managers, na kinabibilangan nina Energy Secretary Sharon Garin, Finance Secretary Frederick Go, Migrant Workers Secretary Hans Leo Cacdac, Economy, Planning and Development Secretary Arsenio Balisacan, Foreign Affairs Secretary Ma. Theresa Lazaro, at Budget Secretary Rolando Toledo.
Kasama rin sina Energy Regulatory Commission Chairperson Francis Saturnino Juan, National Electrification Administration Administrator Antonio Mariano Almeda, Philippine National Oil Company representative Ma. Cristina Sheila Cabaraban, at PNOC-Exploration Corporation official Atty. Adrian Ferdinand Sugay.
Inaasahan dadalo ang hanay ng Revenue and fiscal officials gaya nina Bureau of Internal Revenue Commissioner Charlito Martin Mendoza, Bureau of Customs Commissioner Ariel Nepomuceno, at National Treasurer Sharon Almanza.
Maging ang mga opisyal ng Overseas Workers Welfare Administration (OWWA), Bangko Sentral ng Pilipinas (BSP), at National Tax Research Center (NTRC) ay ipinatawag kabilang ang mga kinatawan ng World Bank (WB) at Asian Development Bank (ADB).
