Romer Butuyan 
HAYAGANG kinalampag ng isang militanteng kongresista ang Senado para buksan at busisiin ang financial records ni Vice President Sara Duterte, tulad ng ginawa ng impeachment court kay former Supreme Court Chief Justice Renato Corona.
Sa isinagawang oral arguments sa senado, iginiit ni Akbayan partylist Rep. Chel Diokno na pwedeng i-subpoena ng Senate impeachment Court ang bank at tax records ng pangalawang pangulo.
Patutsada ng kongresista — kung nagawa noon, bakit hindi pwede gawin ngayon
“Sa huli, binusisi ng hukumang ito ang bank records ni Chief Justice Corona mula sa kanyang unang balance bago pa man siya naging Punong Mahistrado,” wika ni Diokno.
Ginawa ng panig ng tagausig ang argumento para panindigan ang hirit na ipa-subpoena ang bank records, Bureau of Internal Revenue (BIR) records at Anti-Money Laundering Council (AMLC) reports ni Duterte at maging ng asawang si Atty. Manases “Mans” Carpio.
Punto ng House prosecution panel, ang mga nabanggit ang dokumento ay kailangan ilatag sa pagdinig bilang ebidensya sa Article 2 ng impeachment charges, kaugnay ng unexplained wealth, hindi tamang pagdedeklara ng Statements of Assets, Liabilities and Net Worth (SALNs) at pagkakaroon ng business interests na labag sa Saligang Batas.
Pagbabalik-tanaw ni Diokno sa Corona impeachment trial, tumanggi si Philippine Savings (PS) Bank President Pascual Garcia III ilantad ang dalawang peso-denominated accounts ng former chief justice.
Subalit iginiit ng noo’y Senator-Judge Alan Peter Cayetano, na nakaupo rin bilang huwes sa Duterte impeachment trial ngayon, na dapat isumite at buksan ng korte ang nasabing bank records.
Dagdag ng House prosecutor, kinatigan ng tumatayong Senate President at presiding officer Juan Ponce Enrile ang posisyon Cayetano noon, at inutos ang pag-iisyu ng subpoena, kasabay ng direktiba sa manager ng PSBank Katipunan branch na isumite ang bank records ni Corona.
Paalala pa Diokno, humingi ng paglilinaw ang noo’y Senator-Judge Francis Escudero, na siya ngayong Senate impeachment court presiding officer kung dapat mahimay maging ang bank records ni Corona sa panahong hindi pa SC chief ang huli, na tinugon naman ni Cayetano na importante makita nila ito kaya sa huli ay nailantad sa paglilitis ang lahat ng financial documents ng nasasakdal.
Bunsod nito, dapat aniyang panindigan ng senado ang kapangyarihan buksan ang financial records kahit sa panahong hindi pa naitatalaga ang government official sa isang impeachable office lalo pa’t pwedeng gamitin batayan para matukoy kung karapat-dapat ba ito sa kanyang posisyon.
Samantala, tahasan namang sinabi ni prosecution counsel Atty. Lorna Kapunan na hindi sila nababahala kung dumulog na naman sa Korte Suprema ang mga abogadong tagapagtanggol ni Duterte para harangin ang presentasyon sa impeachment court ng financial records ng huli.
“We’re very confident that we are on the right side of history,” pagbibigay-diin ni Kapunan.
“Everybody has a right to question. It’s part of due process. They can, of course, question. However, the prosecution would not speculate on how the high court might rule. But on the part of the prosecution and the state, the prosecutors representing the Republic, the state, we’re very confident,” dagdag ng veteran litigator.
Muling pinanindigan ni Kapunan na ang impeachment trial ay mas nakahihigit at hindi maaaring saklawin ng bank secrecy at tax confidentiality laws dahil sa taglay na mandato alinsunod sa 1987 Constitution.
