NOGRALES PASIMUNO SA PISO-KADA-PIRMA PARA SA CHACHA?

WALANG pasubaling inakusahan ni Davao City Rep. Paolo Duterte ang isang kapwa kongresista na di umano’y kabilang sa grupong namimili ng pirma sa hangaring isulong ang Charter Change (ChaCha) sa anyo ng people’s initiative.

Partikular na tinukoy ni Duterte si PBA partylist Rep. Margarita Nograles na aniya’y pasimuno sa  sa pagsusulong ng people’s initiative sa Davao City.

“To all Dabawenyos, do not sell your soul for a mere P100 or 10,000 in exchange for your signature. If you want to follow the MINIONS of the person DREAMING TO BE GREAT in Congress to perdition that is your choice,” pasaring ni Duterte sa kanyang Facebook post.

“This so-called people’s initiatives for charter change is nothing but pure PI,” dagdag pa ng kapatid ni Vice President Sara Duterte.

“I am against this people’s initiative as this is not the people’s voice but the voice of a few who wanted to perpetuate themselves in power,” aniya pa.

Samantala, pinabulaanan ni Nograles ang alegasyon ni Duterte, kasabay ng giit na nasa Estados Unidos siya para isang pulong kasama ang Filipino-American advocacy groups para sa adbokasiya kontra child pornography at livelihood generation sa mga kababaihan sa Davao region.

Sa kaugnay na balita, inamin ng grupong People’s Initiative for Reform, Modernization and Action (PIRMA) na sila ang nasa likod ng ChaCha advertisement na umere sa telebisyon. Unang lumutang ang grupong pirma ng inilunsad ang people’s initiative sa ilalim ng administrasyon ng yumaong dating Pangulo Fidel Ramos. 

Pag-amin ni Atty. Alex Avisado, sila mismo ang tumulong sa PIRMA para isulong ang madugong laban sa pagsusog ng Konstitusyon.

Samantala, nakatakda naman isulong ni House Deputy Minority Leader at ACT Teachers partylist Rep. France Castro ang paghahain ng resolusyon sa Kamara de Representantes upang silipin ang pinanggalingan ng pondo ng pro-Chacha ad na lumalabas sa telebisyon.

“Were the funds used for this ad from public coffers or money from foreign interests trying to change our Constitution so that they can own most of our country.”