MATAPOS ang testimonya ni Army Colonel Manaros Boransing sa Senate impeachment court, naniniwala si House prosecution spokesperson at Lanao del Sur Rep. Zia Alonto Adiong na dapat balikan ng Commission on Audit (COA) ang pagsusuri sa paggasta sa confidential funds ng Department of Education (DepEd)sa panahon ng panunungkulan ni Vice President Sara Duterte bilang Kalihim. Ayon kay Alonto Adiong, napatunayan sa salaysay ng prosecution witness na ginamit ng DepEd ang Jan. 1, 2024 certification para sa idinaos na walong Youth Leadership Summit (YLS) at 53 Information Education Campaign activities ng Armed Forces of the Philippines (AFP) bilang supporting document sa liquidation report nito ng P15.54 million confidential funds. “I think that would be enough reason for the COA to review its earlier and initial decision,” wika ni Alonto Adiong. Partikular na isinumite ng DepEd ang Army certification sa April 17, 2024 reply nito sa COA Audit Observation Memorandum No. 2024-015, na nag-aatas sa kagawaran ng magbigay ng karagdagang patunay sa kung paano ginastos ang P15.54 million confidential funds matapos ang umano’y surveillance. Para kay Alonto Adiong, dapat muling silipin ng COA ang naturang transaksyon bago ito maglabas ng pinal na posisyon sa kinuwestyong confidential funds disbursements. Iginiit naman ni Tingog Partylist Rep. Jude Acidre na dapat ikonsidera ng COA ang mga naging rebelasyon sa impeachment trial para balikan ang paghihimay sa kung saan napunta ang DepEd confidential funds. Ipinunto rin ni Acidre na dapat patuloy na tupdin ng DepEd officials ang kanilang obligasyon na ipaliwanag ng maayos at tama kung saan napunta ang pera ng taumbayan na ipinagkatiwala sa ahensya. “Definitely, the burden of proof is with the accountable agency. Remember, these are public funds that we are talking about,” ayon pa sa Tingog partylist solon. “Kahit confidential in nature iyong paggamit, it does not erase the accountability of the officers to which the money was entrusted,” pahabol ni Acidre. Facebook Twitter/X LinkedIn Post navigation BSP: Scammer walang kita sa AFASA law ni Sen. Villar House prosecution solb sa salaysay ng 2 AFP officers
