.. 
Ni ESTONG REYES
MATAPOS sentensyahan kaugnay ng bulilyaso sa likod ng Priority Development Assistance Fund (PDAF), muling nadawit sa enkandalo si dating Technology and Livelihood Resource Center (TLRC) deputy director general Dennis Cunanan.
Sa isang pahayag, kinaladkad ni Sen. Risa Hontiveros si Cunanan na di umano’y pasok sa sinalakay Philippine Offshore Gaming Operations (POGO) hubs sa Bamban (Tarlac) at Porac (Pampanga).
Sa dokumentong nakalap ni Hontiveros, lumalabas na si Cunanan ang tumayong “authorized representative” ng dalawang POGO hubs – ang Hong Sheng sa Bamban at ang Lucky South 99 sa Porac.
“Cunanan figured in one of the largest corruption scandals our country has ever seen. Baka yung ginawa niya sa PDAF ay ina-apply niya rin dito sa mga POGO. Pinapakita din nito na may koneksyon talaga ang Bamban at Porac na POGO. Tila nagsama-sama silang mga scammer,” wika ni Hontiveros.
Sa pagpapatuloy ng imbestigasyon ng Senado, kabilang si Cunanan sa nakatakdang igisa kaugnay ng illegal POGO operation sa Bamban, Tarlac.
“We will invite Mr. Cunanan to the next hearing to clarify his involvement. It seems that POGOs are deliberately tapping former and present officials they can easily corrupt,” pasaring ng mambabatas.
Itinakda ang susunod na pagdinig ng Senate Committee on Women, Children, Family Relations and Gender Equality sa darating na Hunyo 25.
