.. 
IMMORAL at iresponsable. Ganito inilarawan ng dalawang grupo sa anila’y garapalang pagpabor ni Secretary Raphael Lotilla sa dambuhalang kumpanya kung saan siya dati nagtrabaho – ang AboitizPower.
Sa paghahain ng kaso ng grupong Sanlakas at Power for People Coalition (P4P) sa Office of the Ombudsman, inakusahan si Lotilla ng paglabag sa Anti-Graft and Corrupt Practices Act, grave misconduct, at conduct prejudicial to the best interest of the service kahapon.
Partikular na tinukoy ng Sanlakas at P4P sa inihaing reklamo ang basbas na iginawad ni Lotilla sa proyekto ng Therma Visayas Inc. sa Cebu na pag-aari ng AboitizPower kung saan nanilbihan siya nanilbihan bilang director – posisyong kanyang binitawan nang itinalaga sa pwesto bilang DOE Secretary ni Pangulong Ferdinand Marcos Jr.
Ayon kay P4P Convenor Gerry Arances, may umiiral na coal moratorium kung saan mahigpit na ipinagbabawal ang pagpo-proseso ng anumang coal project sa bansa, alinsunod sa direktiba ng Palasyo.
Malinaw aniya ang hayagang paglabag ni Lotilla sa moratorium nang i-endorso ang proyekto ng Therma Visayas Inc. Unit 3 na di umano’y magbibigay-daan lamang sa panibagong pagtaas ng singil sa kuryente sa Cebu – bukod sa dagdag polusyon sa rehiyon.
“By approving the expansion of TVI, Secretary Lotilla not only increased the cost of electricity for the people of Cebu and contributed to more pollution in the Central Visayas, but also favored his old company, AboitizPower. AboitizPower was effectively exempted from following the provisions of the coal moratorium, a privilege not given to any other company,” wika ni Arances.
“AboitizPower, as of late as 2023, could not even decide if the plant will be fueled by coal or gas. However, despite the moratorium, they decided to use coal, and the Department of Energy approved their request and claimed the project was exempted despite the project not obviously in the coal pipeline when the moratorium was issued,” saad sa isang bahagi ng reklmo laban kay Lotilla.
