.. 
INISYUHAN na ng subpoena ng Kamara ang mga kontratista — kabilang si Sara Discaya na sinasabing dawit sa mga maanomalyang proyekto ng gobyerno.
Ayon kay Bicol Saro partylist Rep. Terry Ridon na tumatayong co-chairman ng tinaguriang House Infrastructure Committee (Infra-Comm) pormal nang pinadalan ng subpoena si Discaya para dumalo sa susunod na pagdinig sa Setyembre 9.
Bukod kay Discaya, inatasan rin humarap sa Kamara sina Mark Arevalo (Wawao Builders Corp.), Miguel Juntura (St. Timothy Construction Corp.), Eumir Villanueva (Topnotch Catalyst Builders), at Sally Santos (Syms Construction Trading).
Una nang hiniling ng Infra Comm sa Bureau of Immigration (BI) ang pagpapalabas ng Lookout Bulletin Order kina Sally N. Santos ng Syms Construction Trading at former Philippine Contractors Accreditation Board (PCAB) executive director Herbert Matienzo.
Sa isang panayam kamakailan, nilinaw naman ni Deputy Speaker at Zambales Rep. Jay Khonghun, ang pagbibitiw ni Matienzo ay hindi nangangahulugan lusot na ang dating opisyal sa napipintong kasong korapsyon.
“The resignation of Atty. Matienzo should not be seen as an escape from accountability. Kung may mali, may pananagutan. The House of Representatives will continue to dig into the allegations of ‘registration for sale’ at PCAB,” pahayag pa ng ranking House official.
Sa nakaraang pagdinig ay iminungkahi ni Khonghun na isailalim sa lifestyle check ang dating opisyal sa gitna na rin ng alegasyong talamak ang ‘accreditation for sale’ sa PCAB sa ilalim ng kanyang pamamahala. (ROMEO ALLAN BUTUYAN II)
