Gadgets bawal na sa loob ng Senate impeachment court

MAHIGPIT na ipagbabawal ng Senate impeachment court ang pagbibitbit ng anumang uri ng gadgets sa oras ng paglilitis.

Sa isang kalatas, partikular na pagbabawalan ang mga testigong isasalang sa witness stand, matapos magviral sa social media ang isang larawan ni Office of Vice President (OVP) Assistant Chief of Staff Lemuel Ortonio na umano’y may nakasalpak ng “earpiece” habang inuusisa sa pagdinig.

Gayunpaman, nilinaw ni Senate impeachment court presiding officer Sen. Francis Escudero na peke at manipulado ng artificial intelligence ang larawan ni Ortonio na may earpiece.

“Hindi totoo ‘yung lumalabas na mga litrato na diumano may earpiece si Mr. Ortonio, iyon po ay AI. What he had was a front-fold helix. An ear piercing in the front-fold helix of his ear, not an earpiece,” paliwanag ni Escudero.

Hinggil sa restriksyon sa testigo na magdala ng gadget, partikular aniyang pinagbatayan ng korte ang Section 21-E ng A.M. No. 241102 ng Supreme Court kung saan na ipinagbabawal ang pagdadala ng cellphone, tablet at iba pang kahalintulad na gadgets habang may videoconference.

“Accordingly, no witness while testifying shall possess, have access to or use any earpiece, headsets, cellphones, smart watch, smart glasses or any other similar device. Capable of transmitting or receiving information or communication,” ani Escudero.