Romer Butuyan 
MALAKING sorpresa para sa prosekusyon ang paglutang ni former police Corporal Rodulfo Gracioso Jr. para ibunyag ang umano’y paghahatid ng male-maletang pera kay Vice President Sara Duterte.
Pag-amin ni House prosecutor Manila 3rd District Rep. Joel Chua, hindi inaasahan ng lupon ng tagausig ang pasabog ni Gracioso na nagpakilalang dating head security ni former House Speaker Lord Allan Velasco.
“Ang unang-una, ito’y malaking sorpresa para sa amin dahil hindi naman po namin ina-anticipate ’to. Bagamat very timely dahil iyong usapin ngayon na Article II ay pwede mong sabihin na pwedeng konektado dito,” dugtong ni Chua.
“Pero syempre, itong mga binitawan ni Gracioso, kailangan medyo may pag-iingat at pag-aaral muna,” ani Chua.
“Titingnan namin iyong mga corroborative evidence na kanyang mga sinumite nang sa ganun ay tingnan natin iyong magiging bigat ng kanyang salaysay,” paliwanag ng House prosecutor.
Ani Chua, hindi maaaring balewalain ng prosekusyon ang panibagong alegasyon sa bise presidente subalit kailangan muna timbangin mabuti bago pa man gumawa ng anumang hakbang.
Sinabi naman ni House impeachment team adviser and spokesperson Ace Barbers, maaaring iugnay sa Article II ng impeachment charge laban sa bise presidente ang paglalahad ng former police officer.
“Kung merong ebidensya na pwedeng ipakita, pwede itong gamitin bilang karagdagang ebidensya dito sa Article II, iyong unexplained wealth,” sabi pa ni Barbers.
“Itong kay Mr. Gracioso, palagay ko kung ito ay mapapatunayan ng NBI when they conduct their investigation, then this can be used as additional evidence dito sa unexplained wealth,” dagdag niya.
Sinabi ni Barbers na sa ilalim ng naturang impeachment article, kailangan patunayan ng bise presidente kung bakit lumobo sa halos P99 million ang kasalukuyang net worth kumpara sa unang taon ng pagiging isang public official.
“Kung walang lawful income na nakuha siya mula sa kanyang idineklarang mga negosyo bago siya maging Vice President, then therefore it’s a big question mark.”
