.. 
ANG sumalungat sa utos ng hari, mawawalan ng committee. Ganito marahil ang nangyari sa tatlong kongresistang tinanggalan ng komite matapos kontrahin ang impeachment laban kay Vice President Sara Duterte.
Sa sesyon ng Kamara noong Miyerkules ng gabi, naghain ng mosyon si House Assistant Majority Leader at Batangas Rep. Ryan Recto upang tanggalan ng committee chairmanship sina Southern Leyte Rep. Roger Mercado at Agusan del Norte Rep. Dale Corvera.
Si Mercado ang chairman ng House Committee on Population and Family Relations, habang vice chairman naman ng makapangyarihang House Committee on Appropriations si Corvera.
Hindi rin nakalusot sa mapanuring mata ng mayorya si Laguna Rep. Ramil Hernandez na sinibak bilang chairperson ng House Special Committee on Southern Tagalog Development.
Batay sa rekord ng Kamara, pawang bumoto kontra impeachment sina Mercado, Corvera at Hernandez.
