.. 
SA halip na makontrol, mas lumala pa ang korapsyon sa Department of Agriculture (DA), ayon sa grupong Federation of Free Farmers (FFF).
Partikular na tinukoy ni FFF Chairman Leonardo Montemayor ang umano’y irregularidad sa bidding ng farm inputs at equipment.
Panawagan ni Montemayor kay Agriculture Secretary Francis Tiu Laurel, maglunsad ng isang malalimang imbestigasyon sa katiwalian ng mga opisyales ng pinamumunuang kagawaran para hindi na maulit pa ang fertilizer scam na pumutok sa ilalim ng administrasyon ni dating Pangulo at ngayo’y Pampanga Rep. Gloria Macapagal-Arroyo.
Kabilang sa mga sinasabing may bahid ng anomalya ang pamamahagi ng subsidized farm seeds, abono, makinarya at kagamitan.
“While (on paper) biddings and awards are done at the regional or agency level, it is said that the outcomes are being effectively determined by a few high-ranking DA officials and their political backers who control the funding decisions,” wika ng lider-magsasaka.
Bukod sa mga opisyales ng DA, sangkot din umano sa irregularidad ang mga kongresista tulad ni dating House Appropriations Committee chairman former Ako Bicol partylist Rep. Zaldy Co.
“The latter included then Congressman Zaldy Co, who chaired the House Committee on Appropriations.”
Kwento ni Montemayor, binabago ang technical specifications para paboran ang mga supplier na umano’y konektado sa mga hindi pinangalanang DA officials — dahilan para ma-disqualify ang bidders.
Pagkatapos i-disqualify, nakikipag negosasyon umano ang mga DA officials para ipawalambisa ang disqualification kapalit ng mas mataas na komisyon.
