admin 
Ni Estong Reyes
INIHAYAG ni Senador Nancy Binay na dapat magsagawa ng public apology si Indonesian Tourism Minister Sandiaga Uno sa Pilipinas matapos nitong paratangan na ginamit ng Department of Tourism ang rice paddies ng naturang bansa sa tourism video na inihain sa United Nations World Tourism Organization (UNWTO) nitong Hunyo.
Sa deliberasyon ng P2.9 bilyong badyet ng DOT, sinabi ni Binay, chairperson ng Senate committee on tourism dapat humingi ng paumanhini si Uno sa Pilipinas dahil nakasira ito sa imahe ng bansa.
“Saan galing yung statement noong Indonesian Tourism Minister that the rice fields ay parang sa Indonesia? May statement pa sya na nagpapasalamat that we are promoting Indonesia,” ayon kay Binay.
Nilinaw ni Tourism Secretary Christina Frasco na hindi magkatulad ang tourism video sa tinutukoy ni Uno sa ipinalabas sa UNWTO conference sa Cambodia na ginamit sa kontrobersiyal na “Love the Philippines” promotional advertisement.
“The video that was shown during the dinner hosted by the Philippine government did not use any of the footage that were used in the video launched to support the tourism branding,” ayon kay Frasco.
“We deny showing any photos using images of Bali during the dinner hosted by the Philippine government,” dagdag niya.
Ayon sa hepe ng DOT, layunin ng dinner na ipakilala ang Cebu bilang host ng joint commission meetings for UNWTO sa 2024.
“Therefore, the subject of the video that was shown were sceneries in Cebu, which definitely did not include [Indonesian views],” ani Frasco.
Dito naalarma si Binay kaya’t inungkat nito kay Frasco kung nagsagawa ng kaukulang hakbang ang DOT na itama ang statement ni Uno.
Ayon kay Frasco, nagsagawa ng pakikipag-ugnayan ang DOT sa pamamagitan ng diplomatic channel upang maitama ang pahayag, ngunit hanggang ngayon, wala pang tugon ang Indonesia.
Kaya’t itinanong din ni Binay kay Frasco kung personal itong lumiham sa Department of Foreign Affairs upang “i-call out the attention” ng opisyal ng Indonesian, ngunit, ayon sa kalihim, walang ganitong ginawa.
“I think if you are standing by that statement, he should apologize to us,” ayon kay Binay.
Dahil dito, hinamon din ni Binay ang DOT na magpalabas ng press release na komokondena sa pahayag ni Uno, ngunit tinanggihan ito ni Frasco dahil ipinaiiral ng bansa ang “foreign policy of being a friend to all and enemy to none.”
“Obviously, he is not our friend, the mere fact that he is lying. I don’t see any reason why you can’t issue a statement tomorrow saying that he was not telling the truth,” giit ni Binay.
Inatasan pa ni Binay si Frasco na lumihan kay Foreign Affairs Secretary Enrique Manalo, hinggil sa naturang pangyayari.
“Hindi natin ito pwedeng palampasin. If we don’t do anything, ‘yung statement niya ang [magiging] truth and not your truth,” giit ni Binay.
