.. 
SADYANG kakaiba ang Pilipinas kumpara sa ibang bansa. Sa gitna ng umano’y napipintong kakapusan ng supply sa merkado, inaprubahan ng Department of Agriculture (DA) ang pag-angkat ng hindi bababa sa 25 metriko toneladang isda sa pagpasok ng buwan ng Marso.
Katwiran ni Agriculture Secretary Francisco Tiu Laurel Jr. kailangan patatagin ang supply ng pagkain sa bansa para maiwasan ang pagtaas sa presyo ng isda sa mga pamilihan.
Gayunpaman, nagpahayag ng pagkabahala ang hanay ng mga mangingisda sa hinggil sa anila’y posibilidad na pag-angkat ng isda mula sa China na anila’y kumukuha lang ng supply mula sa West Philippine Sea na pasok sa 200-nautical mile Philippine exclusive economic zone.
Una nang itinakda ng National Fisheries and Aquatic Resources Management Council (NFARM) ang import cap noong 2024 bilang “experimental approach” sa layong tugunan ang inflation o taas-presyo ng mga bilihin at pagbutihin ang alokasyon sa import volume ng mga institutional buyer at wet markets.
Sa pahayag ng kagawaran, hangad umano ng pamahalaan malaman kung makakatulong ang import cap para maging matatag ang presyo ng bilihin habang sinisigurado rin ang sapat na suplay ng pagkain sa bansa.
Sa ilalim ng panuntunang inaprubahan ni Laurel, maglalabas ang Bureau of Fisheries and Aquatic Resources (BFAR) ng sanitary and phytosanitary import clearances na may 45-day validity. Mga BFAR-accredited cold storage facility lang ang papayagan mag-imbak ng imported seafoods.
Sakop ng 25,000 metriko toneladang import cap ang mga sumusunod na uri ng isda: Alaskan pollock, barramundi, bluefin tuna, capelin, Chilean sea bass, clams, cobia, cod, croaker, eel, emperor, fish meat, flounder, gindara, grouper, hake, halibut, hamachi, hoki, lobster, marlin, moonfish, mussels, mullet, octopus, oil fish, oyster, pangasius, red snapper, salmon, sardines, scallops, sea bream, silverfish, smelt, soft at hardshell crabs, squid, swordfish, tuna by-products, at yellowtail sole.
