.. 
Ni Romeo Allan Butuyan II
HINDI suportado at walang planong suportahan ng mga retiradong heneral ang patuloy na umuugong na balita hinggil sa di umano’y destabilization plot laban sa administrasyon ni Pangulong Ferdinand Marcos Jr.
Pag-amin ni House Speaker Romualdez, sa kanya mismo unang tiniyak ng 22 retiradong heneral mula sa Armed Forces of the Philippines (AFP) at Philippine Military Academy Alumni Association (PMAAA), Association of Generals and Flag Officers (AGFO), Philippine Military Academy Retirees Association Inc. (PMARAI), at National ROTC Alumni Association, Inc. (NARAAI) ang walang bahid alinlangang katapatan sa Konstitusyon at suporta kay Pangulong Marcos Jr.
Naglabas din ng pahayag ang mga AFP General ilang saglit matapos ang pulong kasama si Romualdez.
“We are all here today, united, to air our support to President Ferdinand Marcos, Jr, his administration, and the leadership of the House of Representatives and the Senate,” saad ni Admiral Danilo Abinoja na tumatayong chairman at chief executive officer ng Philippine Military Academy Alumni Association, Inc.
“We continue to abide by and vow to defend the Constitution, and the duly-constituted authorities. That is our oath, then and until now,” dagdag niya.
Una nang itinanggi ng pamunuan ng AFP at Philippine National Police (PNP) na mayroong destabilization plot laban sa gobyerno. Gayunpaman, sinabi ng kapatid ng pangulo na si Senador Imee Marcos, na “galing sa loob” ang umano’y destab plot.
Sa pahayag na inilabas ng tanggapan ni Romualdez, sinabi umano ni Abinoja na suportado rin si Marcos ng mga iba pang paaralan na para sa mga servicemen gaya ng Navy, Air Force at Coast Guard.
“In fact, the Association of Service Academies of the Philippines is issuing a manifesto of support to President Marcos and his administration,” anang retiradong opisyal.
Nakasaad din sa pahayag na sinabi umano ni retired Major General Marlou Salazar, Vice President ng National ROTC Alumni Association, Inc., na tutol ang kanilang grupo sa ano mang pagtatangka na guluhin ang Marcos administration.
“Ayaw namin magkagulo. A kingdom should not be divided if we want it to succeed,” ani Salazar.
Ayon naman kay retired General and Philippine Military Academy Retired Alumni Association chairman Raul Gonzales – “We support the sentiments of the PMA alumni here today and we are duty-bound to defend the Constitution even now that we are out of service. Some have different beliefs, but the general membership is united in defending this government.”
Ipinakita rin ni retired General and Association of Generals and Flag Officers (AGFO) vice chairman Gerry Doria ang kopya ng resolusyon ng PMA Class 75 na nagsasaad ng pagkondena sa “abhorring acts that undermine the economic, social and political gains that the current administration has put up over the years.”
