admin 
Ni Romeo Allan Butuyan II
ANIM na indibidwal, kasama ang tatlong opisyal ng Department of Agriculture (DA), ang kinasuhan sa manipulasyon sa presyo ng sibuyas, ayon sa kumpirmasyon ni Justice Secretary Jesus Crispin Remulla nitong Miyerkoles.
Ayon kay Remulla, sinampahan ng National Bureau of Investigation (NBI) ng hoarding, falsification at profiteering ang mga opisyal ng Bonena Multipurpose Cooperative na sina Israel Reguyal, Mary Ann dela Rosa at Victor dela Rosa Jimenez.
Samantala, kinasuhan din ng paglabag sa Republic Act 3019 (Anti-Graft and Corrupt Practices Act) sina DA Assistant Secretary Kristine Evangelista, Agribusiness and Marketing Assistance Service (AMAS) officer in charge (OIC) Junibert de Sagun at Bureau of Plant Industry (BPI) director Gerald Panganiban.
Ang tatlong DA official ay sinampahan din ng kasong administratibo dahil sa “insufficiency and incompetence of official duties” sa ilalim ng Revised Administrative Code.
Tiniyak naman ni Speaker Ferdinand Martin Romualdez na magtutuloy-tuloy ang ginagawang pagbabantay ng Kamara de Representantes sa presyo ng bigas, sibuyas, at iba pang produktong agrikultural.
Sinabi ito ni Romualdez kasabay ng kanyang papuri sa Department of Justice (DOJ) at NBI sa pagsasampa ng mga kaso laban sa mga pinaniniwalaang nasa likod ng pagtaas ng presyo ng sibuyas noong huling bahagi ng 2022 na umabot sa P700 kada kilo.
“We welcome this result and we expect prosecutors to make the charges stick. We will continue to monitor prices and we will not hesitate to exercise our power of oversight by conducting an investigation and prodding agencies so we can protect the public from high prices and inflation,” sabi ni Romualdez.
