.. 
SA payak na detention center mananatili ang apat na opisyal ng Department of Public Works and Highways (DPWH) sa bisa ng citation contempt na ipinataw ng Senate blue ribbon committee.
Base sa ginanap na pagdinig ng naturang komite, kinasuhan din ng contempt si Pacific Discaya, may-ari ng St. Gerrard Construction Corporation, na sinasabing sangkot sa malawakang anomalya sa flood control projects sa ilalim ng pangangasiwa ng DPWH.
Pagkatapos ng pagdinig, agad na inihatid ng Office of the Sergeant At Arms (OSAA) ang apat na opisyal ng DPWH kabilang sina dismissed Bulacan 1st District Assistant Engineer Brice Hernandez, DPWH-Bulacan District Engineer Henry Alcantara, and DPWH-Bulacan 1st District Engineering Office acting DE Jaypee Mendoza.
Ayon kay Senador Panfilo Lacson na tumatayong chairman ng naturang komite, mananatili si Discaya at ang mga miyembro ng tinaguriang BGC (Bulacan Group of Contractors) hanggat walang lumalabas na “lift order” ang blue ribbon.
Samantala, pinabulaanan naman ni Senador Jinggoy Estrada ang paratang na humingi siya ng porsyento sa government contracts partikular sa DPWH na binanggit ni Hernandez sa kanyang testimonya sa Kamara.
“I have already been crucified and vilified in the past, and once again I am an easy target. I am very vulnerable to these attacks. I vehemently deny that I asked for a percentage in the contracts. These are all hearsay,” wika ni Estrada na dati nang nakulong sa kasong plunder.
Ibinasura rin ng senador ang aniya’y kawalan ng basehan at maling akusasyon na ginawa ni Hernandez.
Hamon ni Estrada kay Hernandez — patunayan sa komite at sa kanyang harapan ang alegasyong ipinukol sa pagdinig ng House Tri-Committee.
Samantala, pinayuhan naman ni Senate President Vicente Sotto III si Hernandez na ilantad ang katotohanan sa pagdinig hinggil sa anomalyang kinasangkutan.
Inamin din ni Sotto na nakipag-ugnayan na ang Independent Commission for Infrastructure sa kanyang tanggapan. Nais aniya ng ICI suriin si Hernandez, gayundin ang “transcript” ng mga inihayag ng sinibak na inhinyero.
“For the information of Mr. Hernandez and the public, I just received a notice of subpoena duces tecum for you, for your records, from the Independent Commission a while ago. You are said to testify before them. So, I suggest you collect your thoughts and tell the truth because the Independent Commission is a different story from ‘in aid of legislation’ that we are doing here,” ayon kay Sotto.
Ang subpoena duces tecum ay kautusan para sa pagdalo at pagpiprisinta ng mga dokumento sa korte.
Samantala, kinuwestiyon din ng lider ng Senado ang pagliban ni dating DPWH Undersecretary Maria Catalina Cabral at Cezarah Rowena “Sarah” Discaya ng Alpha and Omega Construction. (ESTONG REYES)
