Romer Butuyan 
HINDI nagawang butasan ng mga abogado ni Vice President Sara Duterte ang testimonya ni National Bureau of Investigation (NBI) Senior Agent John Mark Calilung.
Sa isang pulong-balitaan, partikular na tinukoy ni former Surigao del Norte Rep. Robert Ace Barbers na tumatayong adviser ng House prosecution panel, ang ginawang cross examination ng defense panel — bukod pa sa panggigisa ni Senator Judge Robin Padilla.
Ayon kay Barbers, malinaw at matatag na inilatag ni Calilung ang testimonya hinggil sa pagbabanta ni Duterte sa buhay ng pangulo at dalawang iba pa.
“Nakita po natin dito sa Day 3 ng impeachment trial na kung saan ay nagkaroon ang cross-examination ay hindi po natibag o hindi nabutasan ang testimonya na inilatag, binigay ng ating witness na si Agent Mark Calilung,” wika ng former Mindanaoan lawmaker.
“Isa pang pruweba na siya ay nagsasabi ng katotohanan because he was very consistent with all his statements from the beginning and even during the cross-examination, nakita natin na he was firm,” dugtong ni Barbers.
Kinatigan naman ni House prosecutor Rep. Ysabel Maria Zamora ang pahayag ni Barbers at naniniwala na nasagot ng maayos ng pinakaunang testigong naisalang sa impeachment trial ang mga ipinukol na pagtatanong ng depensa.
“We heard the questions propounded by the defense to John Mark Calilung which we believe were sufficiently answered by John Mark Calilung,” ani Zamora.
“That’s why our prosecution decided or we decided not to conduct any redirect examination anymore,” dagdag ng San Juan City lady solon.
Maging ang senator-judges na sina Senators Alan Peter Cayetano, Erwin Tulfo at Joel Villanueva ay nagbato ng “clarificatory questions” kay Calilung.
“Narinig din po natin ang mga tanong ng ating senator judges at lahat naman po ng kanilang katanungan ay nasagot ni John Mark Calilung from questions regarding his training, questions regarding the investigation he conducted, and questions regarding the threats which he investigated,” paglalahad ni Zamora.
Bumilib din ang lady House prosecutor-lawyer sa huling bahagi ng testimonya ng NBI Cybercrime Division senior agent partikular sa kung ano ang paniniwala niya sa pagbabanta ng bise presidente sa buhay nina Pangulong Ferdinand Marcos Jr., First Lady Liza Araneta-Marcos at former Speaker Martin G. Romualdez.
“In fact, ang last statement po ni agent John Mark Calilung ay ‘yung threats po ay absolute.”
