.. 
MATAPOS madawit sa flood control scandal, tuluyan nang nagbitiw sa pwesto bilang Executive Secretary si Lucas Bersamin, ayon sa Palasyo.
Sa isang press briefing, kinumpirma ni Palace Press Officer Claire Castro ang pagbibitiw ni Bersamin bilang pagpapamalas ng “delikadesa.” Kasabay rin sa pagbibitiw si Budget Secretary Amenah Pangandaman.
Kapwa binanggit sina Bersamin at Pangandaman sa isinasagawang imbestigasyon sa isyu ng “budget insertion” sa 2025 national budget.
Sa pagbaba sa pwesto ni Bersamin, agad naman itinalaga ni Pangulong Ferdinand Marcos si Finance Secretary Ralph Recto bilang bagong executive secretary.
Hinirang naman si Budget Undersecretary Rolando Toledo bilang officer-in-charge ng Department of Budget and Management (DBM).
Papalit naman bilang Finance Secretary si Special Assistant to the President for Investment and Economic Affairs Frederick Go.
Kabilang rin sa mga nagbitiw sa pwesto bilang punong-abala ng Presidential Legislative Liaison Office si Adrian Bersamin na pamangkin ng nagresign na executive secretary.
“These leadership changes reinforce the President’s commitment to strengthening institutions, improving coordination across government, and keeping the administration focused on delivering stability, opportunity, and security to Filipino families,” ayon kay Castro.
“The Office of the President assures the public that all agencies will continue to operate without interruption and with the same commitment to effective governance and public service.”
