.. 
NI ROMEO ALLAN BUTUYAN II
MATAPOS sumambulat ang balita hinggil sa hayagang pagkakait ng diskwento para sa mga senior citizens at persons with disability (PWD), nakatakdang isulong ng Kamara ang isang congressional inquiry sa kahilingan ni House Speaker Martin Romualdez.
Sa isang kalatas, inatasan ni Romualdez ang mga kinauukulan komite ng Kamara de Representantes na imbestigahan ang pagtanggi umanong bigyan ang mga nakatatanda at mga taong may kapansanan ng diskwentong nakasaad sa Republic Act 9994 (Expanded Senior Citizens Act of 2010) at RA 10754 (Act Expanding the Benefits and Privileges of PWDs)
“Laws granting benefits to our senior citizens and PWDs should be strictly followed and implemented. And if there are several instances of the improper grant of these privileges and benefits, it becomes the common practice. So, it cannot remain unchecked,” pagbibigay-diin ng House Speaker.
“This is what we hope to achieve in this investigation, to clarify the law and correct all their misconceptions and wrong implementation. Maraming tanong ang ating mga senior citizen at PWDs, bibigyan natin sila ng pagkakataon kapag nagsimula na ang pagdinig sa Kongreso,” dagdag pa niya.
Nanindigan din si Romualdez sa atas ng batas kasunod ng ulat ng di umano’y paglabag na ginagawa ng isang sikat na coffee shop chain kung saan nililimita ang 20%discount na nakasaad sa RA 9994 at RA 10754 at 12% value-added tax exemption sa isang food item at isang inumin na binabayaran ng mga senior citizens at PWD customers ng nasabing establisimyento.
Sa lungsod ng Pasig, isang reklamo ang pormal na inihain din sa Pasig City Prosecutors Office laban sa dalawang opisyal ng isang hotel na tumanggi umanong magbigay ng 20% discount sa isang senior citizen.
“Flagrant violations of the laws that grant benefits to our senior citizens and PWDs are trending topics on social media these past few months. It is high time that the House of Representatives review the implementation of these laws and find out if business establishments are complying with every provision,” ang reaksyon dito ni Speaker Romualdez.
“Until our probe is completed, we urge local authorities and government agencies to step up and ensure the proper and effective implementation of discounts granted to seniors and PWDs across businesses and service providers in the country,” apela naman niya.
Si Speaker Romualdez ang pangunahing may-akda ng R.A. 10754 o ang Act Expanding the Benefits and Privileges of PWDs, na naisabatas noong 2016 na layuning bigyan ng exemption ang mahigit 1.9 milyong PWD sa pagbabayad ng 12% VAT sa ilang piling produkto at serbisyo bukod pa sa 20% discount na ibinibigay sa ilalim ng RA 9442 o ang batas na nag-amyenda at nagpalawak sa saklaw ng RA 7277 o ang Magna Carta for Disabled Persons.
Samantala, hiniling din ng lider ng Kamara sa Department of Social Welfare and Development (DSWD) at National Council on Disability Affairs (NCDA) na magbigay ulat sa publiko at sa Kongreso kaugnay ng implementasyon ng mga nabanggit na batas.
“Napakahalaga na masiguro ng DSWD at ng NCDA na may compliance sa ating mga batas. At para naman sa ating panukalang imbestigasyon, importante ito sa performance ng ating oversight functions na siguruhin ang tamang implementasyon ng mga batas. Bahagi ito ng ating checks and balances,” giit ni Speaker Romualdez.
“I believe that discounts granted to senior citizens and PWDs should not be limited in any way, for as long as they are for their use and personal consumption. Of course, we should also prevent the abuse of these benefits and privileges. Lahat ng ito ay titingnan natin sa ating imbestigasyon,” pagtatapos pa niya.
