admin 
Ni Lily Reyes
PINAALALAHANAN ni Department of the Interior and Local Government (DILG) Secretary Benhur Abalos ang mga kandidato ng Barangay at Sangguniang Kabataan Elections (BSKE) 2023 na maghain agad ng kanilang Statements of Election Contributions and Expenditures (SOCE) nang maaga at huwag hintayin ang deadline.
Partikular na pinayuhan ni Abalos ang mga kandidatong mananalo sa BSKE nitong Oktubre 30 na magsumite ng kanilang SOCE sa Commission on Elections (Comelec) para sa agarang proklamasyon.
“I-submit niyo ang Statement of Contributions and Expenditure sa Comelec. Importante ‘yan. At huwag n’yo nang hintayin ang 30-day deadline,” sabi ni Abalos.
Sa Republic Act No. 7166 o ang Synchronized National and Local Elections and Electoral Reforms Act, walang mga halal na opisyal ang maaaring maupo nang hindi naghain ng kani-kanilang SOCE.
Para sa transparency, ang mga kandidato ay dapat maghain ng kanilang SOCE sa Office of the Election Officer sa kinauukulan bago ang Nobyembre 29, 2023, o hindi lalampas sa isang buwan pagkatapos ng araw ng halalan.
Pinaalalahanan din ng DILG Chief ang mga mananalong kandidato na tiyaking lehitimo ang inventory report ng mga ari-arian at ari-arian ng mga barangay at nai-turn over sa kanila nang maayos.
