.. 
PINANGUNAHAN ni Speaker Martin Romualdez ang pagtanggap sa Kamara ng delegasyon ng Hungarian Member of Parliament, na pinamunuan ni Hungary National Assembly Foreign Affairs Committee Chairman Zsolt Németh para sa pagpapalakas ng political at inter-parliamentary ties sa pagitan ng dalawang bansa.
Para kay Romualdez, malaking bentahe ang pulong kasama ang mga delegado ng Hungarian Parliament para patatagin ang bilateral cooperation sa iba’t-ibang sektor na kapwa magbibigay ng malaking kapakinabangan sa Pilipinas at maging sa Hungary.
“It is a pleasure to meet Chairman Zsolt Németh and discuss the numerous opportunities to strengthen our partnership. Hungary has been a steadfast friend to the Philippines, and I look forward to further deepening our cooperation in the years to come,” ang sabi pa ng lider ng Kamara.
Pinapuriahan din ni Speaker Romualdez ang pagkakaroon ng “high-level exchanges” ng Pilipinas at Hungary, kabilang ang pagdalaw ni Hungarian Foreign Minister Péter Szijjártó noong Hunyo 2023.
“These visits reflect the strong diplomatic ties and mutual respect between our nations,” aniya.
Kapwa inihayag ng dalawang pinuno ang kahalagahan ng pagkakaroon ng matibay na interparliamentary tiies kung saan kinilala at pinasalamatan ni Romualdez ang pagsisikap ni Hungarian Deputy Speaker Istvan Jakab na bumisita sa Manila noong 2021, habang pinangunahan naman ni former Philippine Senate President Juan Miguel Zubiri ang delegasyon nito sa Hungary noong 2019 at 2023.
Para lalo pang palakasin ang ugnayan sa pagitan ng dalawang bansa, inihayag ni Romualdez ang pagkakaroon ng Philippines-Hungary Parliamentarians’ Friendship Group sa House of Representatives, na bubuuin matapos ang May 2025 midterm elections.
“Your visit today is an important addition to our inter-parliamentary relations, and I am confident it will pave the way for more meaningful exchanges,” pahayag ng lider ng Kamara.
“We look forward to the formation of this group,” tugon ni Chairman Németh.
Samantala, ipinabatid ni Romualdez ang posisyon ng Hungary bilang 14th largest trading partner ng Pilipinas sa hanay ng EU member states noong 2023.
Naniniwala ang Leyte lawmaker na mas lalo pang lalakas ang trade relations ng bansa dito dahil na rin sa pagsusulong ng mga produktong gawang-Pinoy tulad ng electronic equipment, machinery, optical products, at medical instruments sa Hungary.
“The recent Philippines-Hungary business forum held during the 6th Meeting of the Joint Commission for Economic Cooperation in December 2023 is a testament to our growing economic ties,” anang lider kongresista.
Pinuri at pinasalamatan din niya ang Hungary sa suporta sa PH-EU Free Trade Agreement na inaasahang magkakaroon ng katuparan ngayong taon.
Suportado rin ng Hungary ang kampanya ng Pilipinas para mapabilang sa United Nations Security Council partikular para sa 2027-2028 term.
Hinggil sa pagiging incoming ASEAN Chair ngayong taon ng Pilipinas, binigyan-diin ni Romualdez ang pagnanais ng bansa na isulong ang inclusive at innovation-led growth, pagpapalakas sa food security, at matibay na maritime cooperation sa rehiyon.
Kaya naman ikinalugod niya ang hangarin ng Hungary na sumunod sa Treaty of Amity and Cooperation sa Southeast Asia dahil batid nito ang kahalagahan ng regional partnerships.
Sa hanay naman ng overseas Filipino workers, nagpasalamat si Speaker Romualdez sa suporta ng Hungary para magkaroon ng Migrant Workers Office sa Budapest para sa kapakinabangan ng nasa 11,600 Pinoy na naninirahan at nagtatrabaho doon.
“Our overseas Filipino workers contribute significantly to Hungary’s economy and society, and we thank the Hungarian government for its continued assistance,” sambit pa niya.
Sinabi ni Chairman Németh na ang Hungarian employers ay kuntento at bilib sa “high standard work ethic” ng Filipino workers kasabay ng mungkahing pagkakaroon ng joint training exercises upang lalong mapalawak ang kooperasyon ng dalawang bansa pagdating sa labor sector. (Romeo Allan Butuyan II)
