.. 
WALA nang dahilan para hindi makabasa at makaunawa sa asignatura ang mga kabataan, ayon kay Senador Sherwin Gatchalian kaugnay ng P9-bilyong pondo na inilaan ng Kongreso upang palawakin ang pagpapatupad ng Academic Recovery and Accessible Learning (ARAL) Program.
Sa isang pahayag, sinabi ni Gatchalian, chairman ng Senate committee on finance, na layunin ng programa na paigtingin ang learning recovery at mapabuti ang reading comprehension ng mag-aaral kahit umangat ang tantos nito kamakailan.
Base sa Middle of School Year Assessments ng Department of Education (DepEd), umangat ng humigit-kumulang limang puntos ang kahandaan bumasa o reading readiness ng mga mag-aaral mula Grade 3 hanggang Grade 6.
Umabot naman sa anim hanggang siyam na puntos ang inangat sa performance ng mga mag-aaral sa Grade 7 hanggang Grade 10, paliwanag ng senador.
Lumalabas din na 3.42 milyong mag-aaral mula Grade 3 hanggang Grade 6, at 1.72 milyong mag-aaral mula Grade 7 hanggang 10 ang malapit nang makamit ang grade-level reading proficiency.
“Bahagi ng makasaysayang pondong inilaan natin para sa sektor ng edukasyon ngayong taon ang buong suporta para sa pagpapatupad ng ARAL Program. Mahalagang hakbang ito upang masugpo natin ang krisis sa edukasyon na matagal na nating hinaharap,” ani Gatchalian, sponsor ng ARAL Program Act.
Sa ilalim ng 2026 national budget, P8.96 bilyon ang inilaan sa ARAL Program upang magkaroon ng 440,000 tutors at matulungan ang 6.7 milyong mag-aaral para sa School Year 2026-2027. (ESTONG REYES)
