.. 
WALANG pondong ilalaan ang pamahalaan para sa mga benepisyaryo ng Ayuda para sa Kapos ang Kita Program (AKAP) sa susunod na taon.
Ito ang kinumpirma ni ni Department of Social Welfare and Development (DSWD) Secretary Rex Gatchalian sa ginanap na budget briefing kung saan tinalakay ang protective services sa ilalim ng 2026 National Expenditure Program (NEP).
Bukod sa AKAP, apektado rin aniya ang mga benepisyaryo ng Assistance for Individuals in Crisis Situation (AICS). Gayunpaman, nilinaw ni Gatchalian na binawasan lamang ang alokasyon para sa naturang programang naglalayong magbigay-agapay sa mga pamilyang apektado ng hindi inaasahang krisis tulad ng kalamidad.
Sa pagtataya ng Kalihim, nasa 7 milyong Pilipino ang mawawala sa talaan ng mga benepisyaryo bunsod ng P50-bilyong ibinawas sa panukalang alokasyon ng nabanggit na departamento.
“Dahil mawawala po yung AKAP, dati nandun sa protective services yun malaking kawalan ho yun and then the budget for AICS also nabawasan din ho. So put together we’re looking at close to around P50 billion worth of reductions,” sambit ni Gatchalian.
Para sa kasalukuyang taon, umabot sa P26.1-bilyon ang inilaang pondo ng gobyerno para sa AKAP. Nasa P44.4 bilyon naman ang pondong inilaan sa AICS.
“For 2026, because of the reduced AICS budget, the target has been reduced from around 6 million to around 3.6 million, so ang maa-underserve natin for next year, projected, if the NEP is to be followed for AICS alone, 2,978,543 individuals is in danger of losing their AICS social welfare. So pag may kailangan sila, itong numero na to ang madi-displaced,” pag-amin ng Kalihim.
“Now because AKAP was deleted from the NEP, we’re looking at another 4 million clients nationwide sa kasalukuyan ay tinutulungan ng programa pero mawawala na rin ho,” dagdag pa ni Gatchalian.
“So we are looking at around 7 million individuals who may not be able to receive social welfare in their crisis situation.”
