.. 
MATAPOS ibasura ng Kamara ang reklamong inihain laban kay Pangulong Ferdinand Marcos Jr., kinumpirma ni House Secretary General Atty. Cheloy Garafil na pormal nang ipinadala ng kanyang tanggapan sa Office of the Speaker ang dalawang impeachment complaint laban kay Vice President Sara Duterte.
“Upon receipt and verification of the complaints and their accompanying endorsements, the Office of the Secretary General forwarded the documents to the Office of the Speaker for appropriate action,” wika ni Garafil.
Paglilinaw ni Garafil, ang nasabing hakbang ay bahagi ng ministerial duty at administrative function ng kanyang tanggapan.
Matatandaan na ang unang verified impeachment complaint na isinampa laban sa bise presidente ay inihain ng mga miyembro ng Makabayan Coalition at inindorso nnina Reps. Antonio Tinio ng Alliance of Concerned Teachers (ACT), Sarah Jane Elago ng Gabriela Women’s Party, at Renee Louise Co ng Kabataan partylist group.
Ang pangalawang impeachment complaint naman ay isinampa ng mga kinatawan ng progressive organizations at civil society groups at inindorso nina Mamamayang Liberal partylist Rep. Leila de Lima at Akbayan partylist Rep. Perci Cendaña. (ROMER R. BUTUYAN)
