.. 
KUMPIYANSA ang isang partylist congressman na maisusumite sa lalong madaling panahon sa Senado ang impeachment complaint laban kay Vice President Sara Duterte.
“Now that the impeachment complaints against Vice President Sara Duterte have been transmitted to the Office of the Speaker, we can expect these to be included in the Order of Business of the House plenary for action as early as February 9, 2026,” pahayag ni Bicol Saro partylist Rep. Terry Ridon na tumatayong chairman ng House Committee on Public Accounts.
Aniya, sa formal transmittal sa tanggapan ni House Speaker Faustino Dy III ng dalawang impeachment complaint laban sa bise presidente, dalawang landas ang maaari nitong tahakin base na rin sa itinakda ng Saligang Batas at House Rules.
“This, however, does not preclude one-third of all House members from endorsing articles of impeachment against the Vice President for direct transmittal to the Senate, so long as no plenary referral has yet been made to the House Committee on Justice,” wika ng House panel head.
Paliwanag ng Bicol Saro partylist solon, maaaring hindi na sumalang sa committee proceedings ang dalawang reklamo kapag nakuha ang sapat na numero ng mga mambabatas na mag-endorso nito bago pormal na maitalaga ng plenaryo ang mga ito sa Justice panel.
Matatandaan na sa nakaraang 19th Congress, isinakdal ng Kamara si Duterte matapos pumirma ang nasa 215 na kongresista bilang endorsers ng impeachment charge at agad ding isinumite sa Senado ang kaukulang Articles of Impeachment. (ROMER R. BUTUYAN)
