Juliet Pacot 
HANGGAT hindi nabibigyang linaw ang pagkamatay ng dalawang manlalaro mula sa Ateneo de Manila University (ADMU), hindi dapat mawala sa paningin ng Department of Justice (DOJ) si Ateneo head coach Tab Baldwin.
Sa isang kalatas, kinumpirma ng DOJ na naglabas na ang Bureau of Immigration (BI) ng immigration lookout bulletin order (ILBO) laban kay Baldwin at tatlong iba pa.
Bukod kay Baldwin, partikular na tinukoy ni Justice Secretary Frederick Vida sina former Ateneo Blue Eagles team manager Christopher Quimpo, assistant coaches Reynaldo Jacinto Jr. at Dean Castaño, assistant coach at Sandro Soriano.
Paglilinaw ng Kalihim, hindi pipigilan ang pagbiyahe ng mga nabanggit na indibidwal.
Aniya, layon lamang ng ILBO mabantayan ang galaw ng mga taong posibleng makapagbigay-linaw sa sinapit nina Blue Eagles men basketball team players Rene Baterbonia at Divine Adili na kapwa nasawi sa team building activity sa lalawigan ng Aurora.
Posible lamang aniya pigilan ang isang indibidwal na umalis ng bansa sa bisa ng precautionary hold departure order (PHDO) sa antas ng preliminary investigation na malapit nang matapos o hold departure order (HDO) kapag nasa korte na ang kaso.
