Romer Butuyan 
PARA sa House prosecution panel, isang malinaw na indikasyon na kabado ang mga abogado ni Vice President Sara Duterte sa pagkontra buksan ang selayadong kahon na naglalaman ng tax records ng pangalawang pangulo.
“Hindi ko nga maintindihan eh, kayo ba? Ano bang nakakatakot doon sa selyadong BIR box na mamarkahan lang naman?” bulalas ng lead prosecutor at Batangas Rep. Gerville Luistro sa isang press briefing.
Ayon sa prosekusyon, bukod sa tigas na pagtutol ng kampo ng bise presidente na buksan ang nasabing kahon, kinontra din ang hirit ng mga tagausig na ihanay ang selyadong BIR tax record sa mga ebidensya.
“Initially, what we are requesting is the opening, so that after the opening, we will be requesting the contents, the documents inside, to be marked,” paglalahad ni Luistro.
“But since they opposed the opening, we contented ourselves with just marking the sealed box. Even the marking of the sealed box was opposed by the defense,” dugtong niya.
Hinamon naman ni House prosecutor at Manila Rep. Joel Chua ang mga abogado ng nasasakdal na hayaang masuri ang mga ebidensya. Aniya, walang dahilan na harangin ang pagbubukas ng kahon kung hindi naman nakasasama ang laman.
“Kung wala namang itinatago, buksan na natin ’yung box. Kung malinis naman po ‘yung kanilang konsyensya, eh ‘di labas ang ebidensya,” tigas na sabi pa ni Chua.
Nanindigan naman si Luistro na markahan ang mismong kahon at mga nilalaman nito, alinsunod sa alituntunin ng pre-trial conference na dapat markado lahat ng ebidensya bago ilatag sa paglilitis ng Senate impeachment court.
“That is why we registered our reservation as to the marking of the box, including its contents, because we understand that there’s a rule that all the evidence must be pre-marked during PTC (pre-trial conference), otherwise we will not be able to present that during the trial. Nevertheless, the records will show that we really tried to have them marked,” paliwanag ni Luistro.
Sa panig ni former senator at Mamamayang Liberal partylist Rep. Leila de Lima, sinabi niyang hindi maintindihan ng prosekusyon ang argumento ng depensa hinggil sa pagbubukas ng BIR box.
Ito’y sa dahilang sinusugan din naman ng depensa ang kapasyahan ng prosecution panel na maitakda bilang reserved evidence ang lahat ng BIR-related documents as possible evidence in their respective pre-trial briefs.
“Katulad nang sa pre-trial brief na sinubmit ng prosecution, meron doon about tax records and reserve documents. And therefore, ganoon din doon sa defense, meron din silang ganoon na plano to submit BIR submissions,” ayon kay De Lima.
“So why are they refusing now to open and make an inventory and find out the contents of that BIR box? Eh sila mismo rin may ganoong reservation, may reserve evidence din sila pertaining to BIR submissions.”
