.. 
Ni EDWIN MORENO
USAP-USAPAN sa hanay ng mga senior officials ng pambansang kapulisan ang di umanno’y napipintong panibagong extension sa pwesto ni Philippine National Police chief Gen. Benjamin Acorda.
Pag-amin PNP Public Information Office (PIO) Chief Col. Jean Fajardo, walang katiyakan kung papalitan – o kung sino ang rekomendadong kapalit ni Acorda, bagamat abala na sa paghahanda ang pambansang kapulisan sa idaraos na seremonyang hudyat ng pagpapalit ng PNP chief bago matapos ang buwan ng Marso.
“I have no information if he will be replaced or who will replace him, but based on the law, the President has the sole authority to choose the next PNP chief from the rank of general and up — all of them are eligible to be appointed,” ani Fajardo.
Ayon kay Fajardo, magwawakas ang termino ni Acorda sa Marso 31 ng kasalukuyang taon.
Una nang umugong ang pagpustura ng tatlong heneral na di umano’y napipisil ni Acorda na kapalit sa pwesto bilang PNP chief.
Sa ilalim ng umiiral na panuntunan ng PNP, pasok sa talaan ng mga kwalipikado ang mga opisyal na may ranggong Brigadier General – kabilang ang mga namumuno ng PNP command group.
Pambato ng PNP Class of 1991 bilang bagong PNP chief sina Deputy Chief for Administration (DCA) Lt. Gen. Emmanuel Peralta, Deputy Chief for Operations Lt. Gen. Michael John Dubria, PNP Directorial Staff Chief Lt. Gen. Jon Arnaldo at Directorate for Comptrollership Major Gen. Rommel Marbil.
Target naman ng PMA Class 92 i-pwesto sinuman kina Directorate for Operations (DO) Major Gen. Ronald Lee, National Capital Region Police Office (NCRPO) Director Major Gen. Jose Melencio Nartatez, Directorate for Investigation and Detective Management (DIDM) Major Gen. Paco Francisco at CIDG Director Major Gen. Romeo Caramat Jr.
