.. 
KUNG ang pagbabatayan ang ‘winning rate’ ng mga kongresistang pumirma sa impeachment case, hindi apektado ang pagsasakdal laban kay Vice President Sara Duterte.
Ito ang binigyan-diin ni Deputy Speaker David “Jayjay” Suarez nang hingan ng reaksyon sa naging pahayag ni Alyansa campaign manager at Navotas Rep. Toby Tiangco na ang pagkatalo ng limang administration senatorial bets ay sanhi ng pagmamadali umanong ma-impeach ang bise presidente.
“Well, unang-una kung titingnan po natin yung winning rate ng mga congressman na pumirma sa impeachment, I think that was at 86%,” wika ng ranking House official.
“Sila po talaga yung dapat makaramdam kung meron man,” dugtong niya.
Pinabulaanan din ni Suarez ang litanya ng Navotas lawmaker na may mga kongresistang napilitan lang pumirma sa impeachment charge dahil sa ‘pressure’.
“There’s no truth to that allegation; there’s no truth to that matter. No one was forced, no one was, how do you say it, asked to sign. And everybody signed the impeachment based on their own volition,” giit pa niya.
“I do respect the opinions of Cong. Toby Tiangco with regards to the matter, although I do not subscribe to it,” dugtong ni Suarez.
Sinabi ni Suarez na bilang campaign manager, maaaring mayroong ibang pananaw si Tiangco hinggil sa realidad sa pangangampanya.
“Pero syempre bilang isang campaign manager, siguro nakikita niya yung terrain, mas nauunawaan niya yun,” ani Suarez, kasabay ng giit na nirerespeto niya ang opinyon ng Alyansa campaign manager sa isyu. (ROMEO ALLAN BUTUYAN II)
