.. 
USAP-USAPAN sa Palasyo ang napipintong sibakan sa Department of Health (DOH) bunsod ng sandamakmak na bulilyaso ng tatlong bida sa kagawaran.
Kabilang sa umano’y nakatakdang sibakin ngayong buwan ng Enero si Health Secretary Teodoro Herbosa kaugnay ng paggamit umano ng government-funded radio program para sumikat bilang paghahanda sa pagtakbo bilang senador sa 2028.
Kabilang sa mga tinukoy ng Alliance for Clean and Transparent Government (ACTGov) ang P98-milyong kontratang pinasok ng departamento para sa isang programa sa radyo.
Bukod kay Herbosa, sabit din umano sa reklamong inihain sa Office of the Ombudsman sina DOH Assistant Secretary Albert Domingo at Director Tina Marasigan.
Para sa grupong ACTGov, malinaw na may conflict of interest sa pagbida ni Herbosa sa radio program kung saan tumatanggap umano ng sweldo ang Kalihim bilang achor.
“The law does not prohibit health promotion. What it prohibits is a public officer using public funds to generate a platform from which he himself benefits,” ayon 24-pahinang reklamo.
Nakasaad din sa reklamo na ang asawa ni Marasigan si Franco Reyes ay executive ng Media Serbisyo Production Corporation (MSPC), ang content provider ng radio station.
Sa panig ni Herbosa, iginiit ng Kalihim na walang iligal sa kontrata, kasabay ng giit na dapat alam ng mga mamamayan ang kanilang karapatan sa mga programa ng kagawaran gayundin ang mga paraan para maiwasan ang karamdaman.
“These initiatives comply with government procurement laws and respect the specific media ethics of each broadcasting platform. Every Filipino has the right to health, which includes education and information on disease prevention and treatment,” pagtatapos ng DOH chief.
