.. 
HABANG milyon-milyong Pilipino ang nagsisiuwian upang alalahanin ang kanilang mga yumaong mahal sa buhay, ikinasa ng Philippine National Police (PNP) ang full alert status para tiyakin ang ligtas, maayos, at mapayapang paggunita ng Undas 2025 sa buong bansa.
Ayon kay Acting PNP Lieutenant General Jose Melencio Nartatez Jr., naka-full alert na ang lahat ng yunit ng PNP sa ilalim ng Oplan Ligtas Undas 2025, bilang tugon sa direktiba ni Pangulong Ferdinand Marcos Jr. na tiyaking ligtas at maaliwalas ang paglalakbay ng publiko sa darating na Undas.
Libu-libong pulis ang idineploy sa mga sementeryo, terminal, simbahan, at pangunahing kalsada upang magbigay-gabay, magpanatili ng kaayusan, at tumulong sa mga biyahero.
“Inutusan natin ang ating mga tauhan na panatilihin ang presensiya ng pulisya at makipag-ugnayan sa mga lokal na pamahalaan at mga opisyal ng barangay upang maiwasan ang krimen at katiwalian,” pahayag ni Nartatez.
“Siguraduhing nakasara at naka-lock ang mga pinto at bintana, naka-unplug ang mga appliances, at ipaalam sa kapitbahay o barangay kung aalis nang matagal,” dagdag pa niya bilang paalala sa publiko.
KAHANDAAN SA UNDAS
Sa ilalim ng Oplan Ligtas Undas 2025, naka-deploy ang mga pulis sa mga pangunahing lugar ng daloy ng tao at sasakyan.
Mula sa mga sementeryo at terminal hanggang sa mga simbahan at expressway checkpoints, handang magbigay ng tulong at gabay ang PNP upang matiyak ang maayos na paglalakbay ng bawat mamamayan.
Layunin ng operasyon na mapanatili ang seguridad, kaayusan, at kapanatagan ng publiko sa panahon ng paggunita ng Undas.
TATAG AT PAGKAKAISA
Si Nartatez na kilala sa tahimik ngunit matatag na pamumuno ay isang lider na nagbibigay-diin na ang kaligtasan ng mamamayan.
Aniya, hindi limitado ang tungkulin ng kapulisan sa kaayusan, kasabay ng giit na higit na angkop ang pagkakaisa at pagtutulungan ng bawat isa.
Sa ilalim ng kanyang pamumuno, pinalakas ng PNP ang ugnayan sa mga lokal na pamahalaan, ahensya ng transportasyon, at mga grupong sibiko upang matiyak ang maayos na daloy ng trapiko at mabilis na tugon sa anumang emerhensiya.
HINDI LANG SA OPISINA
Personal na ininspeksyon ni Nartatez ang mga lugar ng deployment upang tiyaking handa ang mga tauhan sa lahat ng rehiyon.
“Tinitingnan natin kung maayos na naipatupad sa ground ang mga paghahandang ginawa natin para sa Undas ngayong taon. Ang layunin ay masiguro ang ligtas at komportableng biyahe ng lahat ng ating kababayan,” ani Nartatez.
Ang kanyang kalmadong pamumuno ay nagbibigay ng tiwala at inspirasyon sa hanay ng kapulisan—isang paalala na ang tunay na liderato ay nakabatay sa disiplina, malinaw na direksyon, at pagkakaisa sa layunin.
KOORDINASYON, SERBISYO
Pinagtibay ng PNP ang pakikipag-ugnayan sa mga local government units, transport operators, at volunteer groups upang sabay-sabay na masiguro ang kaligtasan ng publiko.
Bahagi rin nito ang pagbabantay sa mga pangunahing terminal, pantalan, at paliparan upang maiwasan ang mga insidente ng krimen at aberya sa biyahe.
24/7 ASSISTANCE DESK
Ayon kay Police Brigadier General Randulf Tuaño, tagapagsalita ng PNP at hepe ng Public Information Office, naka-full deployment na ang lahat ng istasyon at handang tumugon anumang oras.
“Kung kailangan ng tulong o may kahina-hinalang sitwasyon, lumapit sa pinakamalapit na police assistance desk o tumawag sa Unified 911. Nakaantabay ang ating mga pulis 24/7,” ani Tuaño.
Hinikayat din niya ang publiko na makipagtulungan at manatiling disiplinado upang maging matagumpay ang Oplan Ligtas Undas 2025.
LIGTAS NA UNDAS
Bukod sa pagpapanatili ng seguridad, pinaaalalahanan ng PNP ang lahat na maging mahinahon, magalang, at mapagmatyag sa kanilang paglalakbay.
Iwasan ang alitan sa kalsada, bantayan ang mga gamit, at sundin ang mga patakaran sa pampublikong lugar.
Sa pamumuno ni Lt. Gen. Nartatez, malinaw ang mensahe ng PNP: ang ligtas na Undas ay nagsisimula sa disiplina, pakikiisa, at respeto sa kapwa.
MAPAYAPANG UNDAS
Ang Undas 2025 ay hindi lamang panahon ng paggunita kundi isang patunay ng serbisyong pulis na matatag, disiplinado, at tapat sa tungkulin—mga katangiang humuhubog sa pamumuno ni Acting Chief PNP Jose Melencio C. Nartatez Jr.
