.. 
HINDI malayong sa loob ng masikip at mabahong selda bunuin ni Bamban Mayor Alice Guo ang anim na buwang preventive suspension matapos sampahan ng kasong qualified human trafficking ng Zun Yuan Technology Incorporated na pinaniniwalaang pag-aari ng kontrobersyal na alkalde.
Bukod kay Mayor Guo, swak din sa non-bailable case na inihain ng Presidential Anti-Organized Crime Commission (PAOCC) sa Department of Justice (DOJ) si dating Technology and Livelihood Resource Center (TLRC) Deputy Director General Dennis Cunanan at 12 iba pa.
Kabilang sa mga kinasuhan sina Zhang Ruijin, Baoying Lin, Rachelle Joan Malonzo Carreon, Huang Zhiyang, Thelma Barrogo Laranan, Rowena Gonzales Evangelista, Rita Yturralde, Merlie Joy Manalo Castro, Yu Zheng Can, Jaimielyn Santos Cruz, Roderick Paul Pujante at Juan Miguel Alpas.
Nag-ugat ang paghahain ng kaso matapos salakayin ng PAOCC ang illegal POGO operation ng naturang offshore gaming firm sa 10-ektaryang Baofu Compound hindi kalayuan sa munisipyo kung saan nag-oopisina si Guo.
Sa kaugnay na balita, inamin ni Inter-Agency Council Against Trafficking chief Undersecretary Nicholas Ty na nakikipag-ugnayan na din ang ahensya sa Bureau of Immigration (BI) para isama ang pangalan ng alkalde sa immigration lookout bulletin order (ILBO) sa hangaring tiyakin di makakapuslit palabas ng Pilipinas ang si Guo.
Samantala, itinanggi ni Guo ang alegasyong kumakaladkad sa kanyang pangalan sa sinalakay na POGO hub.
Aniya, hindi sapat na batayan na kilala niya ang mga POGO operators para idawit siya sa kaso.
“Having connections to companies or individuals, especially when vague, is not enough to link someone to a case, particularly one involving human trafficking.”
Una nang sinampahan ng Department of Interior and Local Government si Guo ng kasong graft.
