Sara hinimok ipaliwanag nabistong tagong yaman

HINAMON ng prosekusyon si Vice President Sara Duterte na sagutin ang financial records na ipinrisinta sa pagdinig ng Senate impeachment court.

Sa isang kalatas, partikular na kinalampag ni House lead prosecutor at Batangas Rep. Gerville Luistro ang mga defense panel na umano’y dinadaan lang sa teknikalidad ang cross examination sa mga testigo ng prosekusyon.

“They are highly technical pagdating sa cross-examination. Aside from being technical, I really could not imagine what kind of evidence they’ll be bringing out,” wika ni Luistro.

Tahasang sinabi ng Batangas lady solon na dumaan sa masusing pagsusuri ang mga impormasyong unang isiniwalat ni former Senator Antonio Trillanes IV, kabilang ang bulilyaso ng GenCorp Industries Inc. na nagbigay-daan para mahalukay ang iba pang financial transactions ni Duterte at kabiyak na si Atty. Manases Carpio.

Inihalimbawa ng kongresista ang natisod ni forensic financial analyst Alex Cabrera na limang Jollibee fast-food chain franchises ng GenCorpna kabilang sa idineklara ni Duterte sa isinumiteng Statement of Assets, Liabilities and Net Worth (SALN).

Batay sa conservative analysis ni Cabrera, bagama’t sa record ng Securities and Exchange Commission (SEC) ay hindi nakalista si Duterte bilang shareholder o officer ng GenCorp ay mayroon nakatagong 20-percent interest sa korporasyon ang bise presidente.

Sinabi rin ni Luistro na nabusisi rin ng forensic financial analyst ang foreign remittances sa Cale88 Food Corp. kung saan mayroong 47.5 percent shares si Carpio, sa pamamagitan ng naungka na bank transaction records.

Hindi rin aniya dapat ipagwalang-bahala ang daan-daang milyong pumasok sa Cale 88, sa paniwalang pasok ang naturang usapin sa kategorya ng “national security” lalo pa’t pawang kontrolado ng China ang mga kumpanyang nagpasok umano ng pera sa negosyo ng mag-asawa.

“Hindi ko alam kung paano ko i-counter yung napaka-strong and clear evidence ng prosecution except for being very technical,” pahabol ni Luistro.