.. 
Ni Estong Reyes
NAKATAKDANG isalang ng Senado ang pamunuan ng Civil Service Commission (CSC) matapos igiit ng Commission on Higher Education (CHED) na mahigpit na ipinagbabawal ang pagkuha ng mga dual citizen professors para magturo sa mga state colleges and universities (SUC).
Sa ginanap na pagdinig ng Senate subcommittee on constitutional amendments and revision of codes hinggil sa pagbabago sa economic provision ng 1987 Constitution, minarapat ni Senador Sonny Angara humirit sa CSC na magbigay linaw kaugnay ng panuntunan sa pangangalap ng mga titser na may dual citizenship.
Ayon mismo kay CHED chairperson Prospero de Vera II, may memorandum circular na ipinalabas mismo ng CSC noong 2016.
Sa ilalim ng naturang panuntunan, ani de Vera, mahigpit na ipinagbabawal ang pagtatalaga sa gobyerno ng sinumang may dual citizenship maliban kung tatalikuran nito ang kanyang foreign citizenship.
Paliwanag ng CHED chairman, ginagamit ang nasabing patakaran maging sa akademya.
“I’d like to inform the committee that even if you teach in a state university or college, dual citizenship is not allowed. The Civil Service [Commission] requires that you have to give up your citizenship to be able to teach and to be appointed in a state university or college,” aniya.
Tugon naman ni Angara, kanyang kokonsultahin ang CSC sa naturang patakarang anioya’y lubhang makakaapekto sa liberalisasyon ng higher education – “I understand the spirit of this law but maybe medyo baka ma-hold tayo dito sa ganitong klaseng pag-iisip,” ayon kay Angara.
“I think the spirit is to ensure allegiance only to one country but that kind of thinking is a product of a different world, a world where nationality is very important,” dagdag pa niya.
Ayon naman kay Senate Minority Leader Aquilino Pimentel III, nakapaloob sa 1987 Constitution, na mananatiling Pilipino ang mga Pinoy na may dual citizenship.
“Meron pa tayong Balik (Returning)-Scientist Program na most likely kunwari naka-10 to 20 years na sa ibang bansa yun, baka dual citizen na. Bumalik siya dito tapos ano? Di siya pwedeng magturo, ayon kay Pimentel.
Matapos maipalabas ang Memorandum Circular (MC) No. 23 noong 2016, nagpalabas muli ang CSC ng MC 8 sa sumunod na naglilinaw sa sakop ng dating MC na tanging “natural-born Filipino citizens who were naturalized in another country, and later on reacquired their Filipino citizenship.”
“Therefore, Filipino citizens whose foreign citizenship was acquired by birth are not covered by CSC MC 23, s. 2016,” ayon sa memo.
