.. 
MATAPOS kupkupin ng Kamara, pinagtibay ng Senado ang hirit ni Senador Jinggoy Estrada na ilipat sa Pasay City Jail si dating Bulacan assistant district engineer Brice Hernandez sa Pasay City Jail.
Sa direktiba ng Senado, inatasan ang Senate Sergeant-At-Arms na sunduin si Hernandez sa lalong madaling panahon para dalhin sa piitan hindi kalayuan sa gusali ng mataas na kapulungan.
“The Senate Sergeant at Arms is hereby directed to transfer Brice Hernandez to the Pasay City Jail as soon as possible,” saad sa isang pahayag ni Senate President Vicente Sotto III.
Sa isang bukod na mosyon, hiniling naman ni Estrada ang mahigpit na pagbabantay sa nabanggit na dating opisyal ng Department of Public Works and Highways (DPWH).
Ayon kay Estrada, higit na angkop tutukan ang pagtanggap ng bisita ni Hernandez na kabilang sa mga sangkot sa mga nabistong ghost projects sa lalawigan ng Bulacan.
“I think we have to ask the OSAA to be strict in implementing the rules with regards to visitation hours of the prisoner. No visitors allowed, only legit members of the family, lawyers, priests, etc.,” ani Estrada.
Inatasan din ni Sotto ang OSAA na gumawa ng listahan para sa mga dalaw ni Hernandez sa Pasay City Jail.
Sa pagdinig ng Senate Blue Ribbon Committee sa maanomalyang flood control projects, pinatawan ng contempt si Hernandez bunsod ng umano’y pagsisinungaling sa pagdinig ng senado. (ESTONG REYES)
