.. 
HALOS ubos na ang baraha ni dating Negros Oriental Rep. Arnolfo Teves Jr. matapos ibasura Timor-Leste ang hirit ng baliktarin ang naunang kapasyahan kaugnay ng extradition request ng Department of Justice (DOJ) sa layong ibalik sa bansa ang puganteng kongresista.
Sa isang kalatas ng DOJ, pinadala na umano ng Timor Leste Prosecutor-General ang sipi ng kapasyahan ng Timor-Leste Court of Appeals sa motion for reconsideration na isinumite ng kampo ni Teves kaugnay ng napipintong biyahe pabalik ng Pilipinas para harapin ang mahabang talaan ng mga kasong kriminal – kabilang ang pamamaslang kay Negros Oriental Gov. Roel Degamo sa bayan ng Pamplona noong Marso 4 ng nakalipas na taon
“We wish to inform the public that this motion has been denied,” saad sa isang bahagi ng dokumentong natanggap kamakailan ng departamento.
“We recognize the importance of this decision and are committed to maintaining transparency throughout this process,” dugtong pa ng Timor-Leste.
Samantala, lubos naman ikinagagalak ni Justice Secretary Crispin Remulla ang pagbasura sa motion for reconsideration na inihain ng sinibak na kongresista.
“The denial of former Rep. Teves’ motion is a significant step forward in the quest for justice. This decision underscores that justice proceeds irrespective of an individual’s status,” pahayag ng Kalihim.
