.. 
TULAD ng inaasahan, pinadalhan na ng imbitasyon ng Kamara ang nasa 40 pro-Duterte vloggers para dumalo sa pagdinig na kaugnay ng umano’y pagkakalat ng fake news sa social media.
Sa utos ng tri-committee ng Kamara, kabilang sa mga pinatawag sa pagdinig ng joint panel sa Martes (Pebrero 4) ang mga prominenteng personalidad tulad ni former Press Secretary Trixie Cruz Angeles, dating television broadcast journalist Jay Sonza, former Rep. Glenn Chong, Lorraine Badoy na dating tagapagsalita ng National Task Force to End Local Communist Armed Conflict (NTF-ELCAC), Manila Times columnist Malou Tiquia, at 35 pang iba.
Ang tri comm ay binubuo ng House Committees on Public Order and Safety, Public Information, at Information and Communications Technology.
Ayon kay Laguna Rep. Dan Fernandez na tumatayong chairperson ng Committee on Public Order and Safety, target ng Kamara tiyakin ang protektahan ang mga Pilipino laban sa mga aniya’y mapanlinlang na impormasyon.
“Ang mga Pilipino ay may karapatan sa katotohanan. Dapat protektahan natin ang ating mga kababayan laban sa maling impormasyong nagdudulot ng takot at pagkakawatak-watak sa ating lipunan,” wika ni Fernandez.
Pasok din sa talaan ng mga vloggers na tatalupan ng Kamara sina Krizette Lauretta Chu, Mark Anthony Lopez, Allan Troy “Sass” Rogando Sasot, MJ Quiambao Reyes, Vivian Zapata Rodriguez, Ethel Pineda, Jeffrey Almendras Celiz, Lord Byron Cristobal (Banat By), Alex Destor (Tio Moreno), Aaron Peña (Old School Pinoy), Manuel Mata Jr. (Kokolokoy), Elizabeth Joie Cruz (Joie De Vivre), Claro Ganac, Claire Eden Contreras (Maharlika Boldyakera), Jonathan Morales, at Cyrus Preglo (Optics Politics).
Kasama rin sa mga “imbitado” sina Maricar Serrano, Ernesto S. Abines Jr. (Jun Abines), Julius Melanosi Maui (Maui Spencer), Darwin Salceda (Boss Dada TV), Elmer Jugalbot (Eb Jugalbot), Cathy Binag, MJ Mondejar, Suzanne Batalla (IamShanwein), Joe Smith Medina (Political Witch Boy), Jeffrey G. Cruz (JCCO/ JJ Cruz), Alven L. Montero, Kester Ramon John Balibalos Tan (Mr Realtalker), Edwin Jamora (Reyna Elena), Ma Florinda Espenilla-Duque (Pebbles Duque), Dr. Richard Tesoro Mata (Dr. Richard and Erika Mata), Ahmed Paglinawan (Luminous by Trixie & Ahmed), Ryan Lingo, Atty. Enzo Recto (Atty. Ricky Tomotorgo), at Ross Flores Del Rosario (Wazzup Philippines).
Inimbitahan din sa pagdinig ang mga kinatawan ng Google, Meta (Facebook), at ByteDance (TikTok), mga opisyal ng National Bureau of Investigation (NBI), Philippine National Police (PNP), at Department of Justice (DOJ).
“Hindi natin hahayaang gamitin ang social media upang linlangin ang ating mga kababayan. Panahon na upang maipatupad ang mas mahigpit na batas upang labanan ang fake news at disinformation,” ani Fernandez.
