Lucio Para 
MATAPOS ang pormal na panunumpa bilang bagong Kalihim, agad na ikinasa ni Health Secretary Jose Pujalte Jr. ang malawakang balasahan sa Department of Health (DOH).
Sa ilalim ng Department Personnel Order No. 2026-4726, inaprubahan ni Pujalte ang “reorganization” sa loob ng kagawaran. Kabilang sa mga ikinasa ng bagong Kalihim ang pansamantalang pagtatalaga at paglipat ng mga opisyal sa DOH Central Office, Centers for Health Development (CHD), at iba pang mga operating unit.
Ayon sa DOH, mananatili ang bisa ng direktiba habang nagsasagawa ng performance evaluation sa hanay ng mga opisyal.
Paglilinaw ng Kalihim, hindi apektado ng reorganization ang serbisyong pangkalusugan lalo pa’t may mga humalili na sa mga apektadong opisyales ng kagawaran.
Kabilang sa mga itinalaga sina Director IV Rowena Lora bilang pinuno ng Internal Audit Service, Assistant Secretary Christian Lel Saquilabon bilang concurrent director ng Legal Service, Engr. Maximo Adan Jr. bilang officer-in-charge ng Health Facilities Enhancement Program Management Office, at Roderick Napulan bilang pinuno ng Health Policy Development and Planning Bureau.
Nagkaroon din ng mga bagong pagtatalaga sa ilang pangunahing tanggapan tulad ng Bureau of Local Health Systems Development, Bureau of International Health Cooperation, Health Human Resource Development Bureau, Disease Prevention and Control Bureau, Epidemiology Bureau, Research Institute for Tropical Medicine, Procurement Service, at Knowledge Management and Information Technology Service.
Nagtalaga rin si Pujalte ng mga bagong direktor at officer-in-charge sa lahat ng Centers for Health Development sa buong bansa, habang nananatili sa ilalim ng direktang pangangasiwa ng Office of the Secretary ang Philippine Health Insurance Corp. (PhilHealth), Food and Drug Administration (FDA), at mga specialty hospital ng gobyerno.
