PARA sa mas maayos na pangangasiwa, iminungkahi ng isang kongresista ang pagkakaroon ng isang gobernador sa Metro Manila. Sa binigkas na privilege speech sa Kamara, binigyang-diin ni Caloocan City Rep. Edgar Erice ang bentahe ng isang direksyon para sa rehiyon na binubuo ng 16 na lungsod at isang munisipalidad. Partikular na tinukoy ni Erice ang pangangailangan ng isahang tugon sa mga problema ng Metro Manila sa trapik, baha, basura, polusyon, transportasyon at maging sa usapin ng iskwater. Pinuna rin ni Erice ang magkakaibang prayoridad na nagsisilbing balakid para makamit ang asam-asam na kaayusan sa Metro Manila. “One metropolis. Seventeen governments. Seventeen priorities. Seventeen political interests,” wika pa ng kongresista, kasabay ng giit sa mungkahing magkaroon ng gobernador na kukumpas sa isang direksyon para sa rehiyon. “Metropolitan Government could be given clearly defined authority over metropolitan transportation and traffic management, major road networks, integrated flood control and drainage, solid-waste processing and final disposal, land-use planning, waterway rehabilitation, regional housing and resettlement, disaster-risk reduction, and environmental protection,” aniya pa. Sa ilalim ng administrasyon ni yumaong dating Pangulong Ferdinand Marcos Sr., nagsilbing Metro Manila Governor ang noo’y First Lady na si Imelda Romualdez Marcos. Taong 1990 naman binuo ang Metro Manila Authority (MMA) na kalaunan ay naging Metro Manila Development Authority (MMDA). Facebook Twitter/X LinkedIn Post navigation Balikbayan silat sa NAIA, dawit sa kidnap at estafa
