Romer Butuyan 
WALANG dahilan para maantala ang pagtalakay ng Kamara sa panukalang 2027 national budget — kahit pa may gumugulong na impeachment.
Sa isang kalatas, tiniyak ni House Majority Leader Sandro Marcos ang kahandaan ng mababang kapulungan isailalim sa deliberasyon ang National Expenditure Program (NEP), na inaasahang isusumite ng Palasyo sa mga susunod na araw.
“Wala naman yung impeachment sa Lower House. We will continue doing our job,” wika ng kongresista mula sa Ilocos Norte.
“I don’t think it will affect, at least I can only speak on behalf of the Lower House. It will not affect what we have to do and what needs to be done,” dugtong ni Marcos.
Sa ilalim aniya ng annual budget process, ipapasa ng Ehekutibo sa Kongreso ang NEP na magsisilbing gabay sa pagbalangkas ng General Appropriations Bill (GAB), na bubusisiin naman ng House Committee on Appropriations sa bisa ng pagdinig sa hirit ng budget ng bawat ahensya.
Para kay Marcos, ang proseso sa Kamara ang pinakamahalagang yugto ng pagsasabatas ng national budget na kapwa pagtitibayin ng mababang kapulungan bago pa man talakayin ng senado.
“We are expecting the NEP to be turned over sometime next month, hopefully not too late, but hopefully the NEP turnover will be sometime in August. Then we can proceed with the budget briefings,” ani Marcos.
Nangako naman ang House majority leader na ipagpapatuloy ng Kamara, sa ilalim ng liderato ni Speaker Faustino Dy III ang mga repormang ipinatupad sa pagtalakay sa panukalang pambansang badyet kasama ang mga civil society groups.
“Marami namang ginawa ang Appro para manigurado that the budget process is much more transparent. We will make sure that different civic groups are involved in the shaping, and the analysis of the budget,” sabi pa ni Marcos.
“So I think we will continue with all the reforms already implemented last year.”
