.. 
Ni JAM NAVALES
ISINUSULONG ni House Committee on Health Vice-Chairperson at AnaKalusugan partylist Rep. Ray Reyes ang pagkakaroon ng programa kung saan libreng ipagkakaloob ng pamahalaan ang taunan o annual medical check-ups ng bawat mamamayang Pilipino.
Sa House Bill 430 na akda ni Reyes, target ng kongresista palawigin sa isinusulong Universal Health Care Law ang free annual medical check up.
Kabilang rin – pero hindi limatado – sa mga aniya’y dapat balikatin sa ilalim ng UHC Law ang blood sugar at cholesterol tests.
Kumbinsido rin si Reyes na sa pamamagitan ng naturang programa mapapalakas ang Konsulta Program ng Philippine Health Insurance Corporation (PhilHealth), na naglalayong bigyan ng mahusay at sapat na serbisyong medikal ang bawat Pilipino.
Sa ngayon, ang Konsulta program ay nagkakaloob ng primary care benefit package kabilang ang pagbabayad para sa annual checkups, ilang diagnostics tests at gamot na hanggang P1,700 kada pasyente bawat taon.
“We thank Philhealth for expanding their packages and for the Konsulta Program, which we have been harping on/pushing for ever since. But we need to make these programs more responsive by ensuring sustainability and continuity — regardless of political dynamics,” pahayag naman Reyes.
“We have to insulate these programs from political whims by embodying them in the LEDAC-approved Amendments to the UHC Law,” dagdag ng kongresista.
Samantala, ikinalugod naman ni Reyes ang pagtukoy ng Legislative-Executive Development Advisory Council (LEDAC) sa “priority measures” na naglalayong lumikha ng marami pang trabaho, pagpapalakas sa health system, at at pagpapalago sa ekonomiya.
“I always say that President Marcos is the chief salesman of the Philippines and the priority measures identified by LEDAC show that he is ready to deliver on his promise of building a Bagong Pilipinas,” sabi pa ni Reyes.
“Under the leadership of Speaker Martin Romualdez, we reaffirm our support to the passage of these bills that encourage economic growth, strengthen the public health system, and boost foreign investments,” wika pa ng House panel official.
Kabilang sa listahan ng priority measures ng LEDAC ay ang pag-amyenda sa Universal Health Care (UHC) Law.
Gayunpaman, nakukulangan pa rin ang kongresista – dahilan kung bakit higit na kailangan isama ang Free Annual Check-up sa UHC Law.
