.. 
HINDI pa man nag-iinit sa pwesto, agad na nagpasiklab ang balik-senadong mambabatas matapos maghain ng isang panukalang batas na naglalayong higpitan ang mga menor de edad sa paggamit ng social media.
Partikular na target ng panukalang batas na inihain ni Senador Panfilo “Ping” Lacson protektahan ang hanay ng mga kabataan laban sa masamang epekto ng overexposure.
Binanggit ni Lacson ang mga pag-aaral na nag-uugnay ng sobrang paggamit ng social media sa posibleng mental health problems, pagkabalisa, depresyon at social isolation.
“A UNICEF (United Nations Children’s Fund) study… revealed that Filipino children and adolescents have grown vulnerable to cyberbullying, body image pressures, and online harassment because of social media exposure,” saad sa isang bahagi ng panukala ni Lacson.
Sa ilalim ng legislative bill — “An Act Regulating the Use of Social Media Platforms by Minors, Imposing Age Restrictions, Providing Penalties for Violations Thereof, and for Other Purposes” — limitado ang “social media access” ng mga batang wala pa sa edad 18-anyos.
Sa sandaling ganap na maging batas, obligado rin ang mga social media platforms magkaroon ng paraan para matiyak ang edad at pagkakakilanlan ng social media user, tulad ng ID verification, facial recognition, at ibang identity authentication systems; regular audit ng user account data; at pagresponde sa age-restricted users sa platform.
Sa ulat ng Council for the Welfare of Children, isa sa bawa’t tatlong bata sa Pilipinas na edad 0 hanggang 18 ang gumagamit ng internet. Ayon naman sa National ICT Household Survey, 60% ng kabataan na may edad 10 hanggang 17 ay may internet access at aktibong gumagamit ng social media.
Ayon kay Lacson, ang ibang bansa tulad ng Australia ay meron nang polisiya para i-regulate ang access ng mga menor de edad sa social media at online platforms.
Ipinunto niya na ang pagpasa ng Australia ng batas na nag-set ng minimum age limit para sa social media platforms ay bahagi ng estratehiya nito para tiyakin ang ligtas na digital spaces para sa lahat.
“Taking inspiration from this model, and in adherence to our State’s declared policy of promoting and protecting the mental and emotional well-being of its children, this bill is being proposed to protect Filipino children below 18 years old from online risks and harmful content by prohibiting minors from accessing or using social media platforms,” ani Lacson.
Dapat rin aniyang tiyakin ng platform providers na ang nakuhang data ay “limited, secure, and retained only for the period necessary to fulfill its intended lawful purpose.”
Mungkahi ng senador, Department of Information and Communications Technology (DICT) ang tatayong pangunahing implementing agency.
Ito rin umano ang magmo-monitor ng pagsunod ng mga social media platforms, at gagawa ng mekanismo para ma-report ang paglabag. Ito rin aniya ang mag-iimbestiga ng mga reklamo tungkol sa paglabag ng batas.
Bibigyan din ng kapangyarihan ang naturang kagawaran mag-issue ng disabling order para alisin ang account na gamit ng age-restricted user.
Para sa mga lalabag na social media platform at service provider, papatawan ng multa mula isa hanggang P20 milyon “for each act of non-compliance.” May arawang multa rin ng hanggang P100,000 para sa bawa’t araw ng hindi pagsunod sa batas – hanggang sa tuluyang suspensyon o pagbawi ng lisensya.
Wa;a rin kawala ang mga Internet Service Providers (ISPs) na may administrative fine na P300,000 hanggang P3 milyon kung hindi nila maipatupad ang Disabling Order ng DICT. Maari rin silang suspendihin o tanggalan ng lisensya para sa patuloy na paglabag.
Ang Third-Party Age Verification Providers ay magkakaroon ng administrative fine ng P500,000 hanggang P5 million kung hindi masunod ang data privacy provisions o verification standards. (ESTONG REYES)
